ހައިޟުވުމާއި ގުޅިގެން ޚާއްސަ ޗުއްޓީއެއް ދިނުމަށް ފޮނަދޫ ދާއިރާގެ މެންބަރު މޫސާ ސިރާޖު ވަޒީފާއާއި ބެހޭ ޤާނޫނަށް އިސްލާހު ހުށައަޅި އިސްލާހު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޕާލިމެންޓްރީ ގްރޫޕުން ފާހެއް ނުވި އެވެ.
އެގޮތުން މެންބަރު މޫސާ ސިރާޖު ހުށައެޅުއްވި އިސްލާހުގައި ވަނީ ސަމާލުގެ ޗުއްޓީގެ އިތުރުން ކޮންމެ އަންހެން މުވައްޒަފަކަށް ހައިޟުވުމާއި ގުޅިގެން ދެވޭ ޗުއްޓީގެ ގޮތުގައި ކޮންމެ މަހަކު މުސާރަ ލިބޭ ގޮތަށް، ވަޒީފާއާއި ބެހޭ ޤާނޫނުގެ ދަށުން ލިބޭ ސަލާމުގެ ޗުއްޓީގެ އިތުރުން 1 ދުވަހުގެ ޗުއްޓީއެއް ދޭންވާނެކަމަށެވެ.
އެގޮތުން މި ޗުއްޓީއަށް އެދޭ މުވައްޒަފު އެ ޗުއްޓީ ޙައްޤުކަން ސާބިތުކޮށްދިނުމަށް އެއްވެސް ލިޔުމެއް ހުށައަޅަން ނުޖެހޭނެކަމަށްވެސް ވަނީ މި އިސްލާހުގައި ހިމަނާފައެވެ.
މީގެ އިތުރުން މި ޗުއްޓީގެ ބޭނުން ނުކޮށް ވަޒީފާއަށް ނިކުންނަނަމަ ކޮންމެ މަހަކަށް ދެވޭ މުސާރައިގެ އިތުރުން އެ މުވައްޒަފެއްގެ އަސާސީ މުސާރައިން 1 ދުވަހަށް ޖެހޭ މިންވަރު އެ މުވައްޒަފަކަށް ދޭންވެސް އިސްލާހުގައި ބުނެފައިވެއެވެ.
ހައިޟުވުމާއި ގުޅިގެން ޚާއްސަ ޗުއްޓީއެއް ދިނުމަށް ހުށަހެޅި އިސްލާހުތަކަށް އެމްޑީޕީ ޕީޖީ ގްރޫޕުގައި ރޭ ވޯޓަށް އަހައިފައި ވެއެވެ. އަދި އެ އިސްލާހު ފާސްވެފައެއް ނުވެ އެވެ. އެހެންކަމުން އެ ބިލު އަނބުރާ ގެންދަވާނެ ކަމަށް ސިރާޖު ވަނީ ވިދާޅުވެފަ އެވެ.
ވަޒީފާއާ ބެހޭ ގާނޫނަށް އިސްލާހު ގެނައުމުގެ ބިލު ދިރާސާކޮށް ނިންމާ، މިހާރު ވަނީ ރިޕޯޓު މަޖިލީހުގެ ތަޅުމަށް ފޮނުވާފަ އެވެ. އެ ބިލް ދިރާސާ ކުރީ އިގްތިސޯދީ އަދި އިޖުތިމާއީ ކޮމިޓީގެ ޖޮއިންޓް ކޮމިޓީއިންނެވެ.
