އިންޑިއާ އަދި ޕާކިސްތާނުން އެތަނެއްގެ މިލްކުވެރިކަމަށް ދައުވާކުރާ ކަޝްމީރުގެ އިންޑިއާ އާއި ވީފަޅިއަށް ޕާކިސްތާން ސިފައިން ދިން ހަމަލާތަކުގައި އިންޑިއާ ސިފައިންގެ ތިން މީހުން މަރުވެފައިވާކަމަށް އެގައުމުން ބުނެފިއެވެ.
އިންޑިއާ ސިފައިންގެ ތަރުޖަމާނަކާއި ހަވާލާދީ އަލްޖަޒީރާގައި ބުނެފައިވަނީ ޕާކިސްތާން ސިފައިން މިދިޔަ ބުރާސްފަތި ދުވަހު ދިން ހަމަލާ ތަކެއްގައި އިންޑިއާ ސިފައިންގެ ދެމީހުން މަރުވެ ހަތަރު މީހަކު ޒަހަމްވެފައިވާ ކަމަށެވެ. އަދި އިންޑިއާ ސިފައިންގެ ތިންވަނަ މީހާ މަރުވެފައިވަނީ ބުރާސްފަތި ދުވަހުގެ ރޭ ޕާކިސްތާން ސިފައިންދިން ހަމަލާތަކެއްގައި ކަމަށެވެ.
ޕާކިސްތާން ސިފައިން ތުހުމަތުކުރާ ގޮތުގައި ހަމަލާ ބަދަލުކުރުން ހުއްޓާލުމަށް ދެގައުމުން ވެފައިވާ އެއްބަސްވުމާއި ފުރަތަމަ ހިލާފުވެފައިވަނީ އިންޑިއާ ސިފައިންނެވެ. މިގޮތުން އިންޑިއާ ސިފައިން ދިން ހަމަލާއެއްގައި އާމުންގެ ތެރެއިން އެކަކު ވަރަށް ބޮޑަށް ޒަހަމްވެފައިވާ ކަމަށް ޕާކިސްތާން ސިފައިން ބުނެއެވެ.
ޕާކިސްތާނުގެ ހާރިޖީ ވުޒާރާއިން ތުހުމަތުކުރާ ގޮތުގައި އިންޑިއާއިން ހަމަލާ ބަދަލުކުރުމުގެ އެއްބަސްވުމާ ހިލާފުވެ ޕާކިސްތާނާއި ވީފަޅިއަށް ހަމަލާ ދީފައިވަނީ އިންޑިއާއިން ކަޝްމީރު ރައްޔިތުންނާއި ދެކޮޅަށް ހިނގާ އިންސާނިއްޔަތާއި ހިލާފު އަމަލުތައް ފޮރުވުމުގެ ބޭނުމުގައެވެ.
ޕާކިސްތާނުގެ ހާރިޖީ ވުޒާރާއިން އިތުރަށް ބުނެފައިވަނީ ހަމަލާ ބަދަލުކުރަން ހުއްޓާލުމަށް ދެގައުމުން ވެފައިވާ އެއްބަސްވުމާއި ހިލާފު2،404 އަމަލު އިންޑިއާ ސިފައިން މިއަހަރު އެކަނިވެސް ހިނގައިފައިވާ ކަމަށެވެ. އަދި މި އަމަލުތަކުގެ ސަބަބުން މުޅި ޖުމްލަ 19 މީހުން މަރުވެ 192 އާމުންގެ މީހުން ޒަހަމްވެފައިވާ ކަމަށެވެ.
ކަޝްމީރަކީ އެތަނެއްގެ މިލްކުވެރިކަމަށް އިންޑިއާ އަދި ޕާކިސްތާނުވެސް ދައުވާކުރާ ކުދުރަތީ ރީތިކަމުން މުއްސަނދިވެފައިވާ ސަރަހައްދެކެވެ. މިސަރަހައްދުގެ އާބާދީގެ ގިނަ މީހުންނަކީ މުސްލިމުންނެވެ.
