ރައްޔިތުންގެ މަޖިލީހުގެ ކޮޓަރިއެއް ފުލުހުންގެ ބަޔަކު ބަގު ކުރަން އުޅުނު މައްސަލައެއް މަޖިލީހުގެ ސާޖަންޓް އެޓް އާމްސް ބައްލަވަން ފައްޓަވާފައިވާ ކަމަށް ނަޝީދު މިއަދު ވިދާޅުވެފައިވަނިކޮށް، ހާމަނުކުރެވޭވަރުގެ ކަންކަން މަޖިލީހުގައި ހިނގަނީތޯ އެމްޑީޕީގެ ކުރީގެ ރައީސް އިބްރާހިމް އިސްމާއީލް (އިބުރާ) ވިދާޅުވެއްޖެއެވެ.
އިބުރާ ދެންމެކުރި ޓުވީޓެއްގައި ބުނެފައިވަނީ، މަޖިލިސް ބަގު ކުރާކަށް ނުޖެހޭ ކަމަށާއި ގާނޫނު އަސާސީ ބުނާގޮތުން ގައުމީ ސަލާމަތާ ބެހޭ ކަންކަން ފިޔަވައި މަޖިލީހުގައި ހިނގާ ކޮންމެ ކަމެއް އާންމު ކުރަން ޖެހޭނެ ކަމަށެވެ. އަނެއްކާ ހާމަނުކުރެވޭ ވަރުގެ ކަންކަން މަޖިލީހުގައި ހިނގަނީތޯ އިބުރާ ސުވާލު އުފައްދައިފައި ވެއެވެ.
"މަޖިލިސް "ބަގު" ކުރާކަށް ނުޖެހޭނެ، ގާނޫނު އަސާސީ ބުނާގޮތުން މަޖިލީހުގައި ހިނގާ ކޮންމެ ކަމަކީ އާންމު ކުރަން ޖެހޭ ކަންކަން، އިސްތިސްނާ އަކީ ގައުމީ ސަލާމަތާ ބެހޭ ކަންކަން، އަނެއްކާ ހާމަ ނުކުރެވޭ ވަރުގެ ކަންކަން މަޖިލީހުގައި ހިނގަނީބާ؟؟" އިބުރާގެ ޓުވީޓުގައި ބުނެފައި ވެއެވެ.
މިއަދުގެ ޖަލްސާ ފައްޓަވައި ރިޔާސަތުން އަންގާ އެންގެވުމެއްގެ ގޮތުގައި ނަޝީދު ވިދާޅުވީ، ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲގެ ކޮޓަރިކޮޅާއި މަޖިލީހުގެ ކޮމިޓީއެއްގެ ބައްދަލުވުން ބާއްވާ ކޮޓަރިއެއް ބަގްކުރަން ފުލުހުންގެ ބަޔަކު އުޅުނު ކަމަށް ބުނާ މައްސަލައެއް މަޖިލީހުގެ ސާޖަންޓް އެޓް އާމްސް ބައްލަވަން ފައްޓަވާފައިވާ ކަމަށެވެ.
"އަޅުގަނޑަކަށް ނޭނގޭ އެއީ ކޮން ބޭނުމެއްގައި ކަމެއް. އަޅުގަނޑުގެ ކޮޓަރީގައި ވެސް މި ބާވަތުގެ އާލާތް ހަރުކުރުމަށް މަޖިލީހުގެ ސެކިއުރިޓީ ސްޓާފުންނާއި ފުލުސް އޮފީހުގައި މަސައްކަތްކުރާ މީހަކާ ވާހަކަ ދެއްކެވި، އެ ސެކިއުރިޓީ ސްޓާފު ވަނީ މަޖިލީހުގެ ސާޖަންޓް އެޓް އާމްސް އާއި ސެކްރެޓަރީ ޖެނެރަލް އަށް އެ މައުލޫމާތު ދީފައި،" ނަޝީދު ވިދާޅުވި އެވެ.
