ދައުލަތުން ގާނޫނީ ވަކީލެއްގެ އެހިތެރިކަން ފޯރުކޮށްދޭން އާ ގަވާއިދެއް އެކުލަވާލައި އެއަށް އަމަލު ކުރަން ފަށައިފިއެވެ.
ބަންޑާރަ ނައިބުގެ އޮފީހުން ވިދާޅުވީ އާ ގަވާއިދަކީ، ޖިނާއީ ބޮޑެތި މައްސަލަތަކުގައި ތުހުމަތުވާ މީހުންގެ ތެރެއިން ގާނޫނީ ވަކީލެއްގެ އެހީ ހޯދޭނެ ތަނަވަސް ކަން ނެތް މީހުނަކީ ކޮބައިކަން ކަނޑައަޅައި، އެފަދަ މީހުނަށް ދައުލަތުން ވަކީލެއްގެ އެހީ ފޯރުކޮށްދިނުމުގެ އުސޫލުތައް ބަޔާންކުރާ ގަވައިދެއް ކަމަށެވެ.
އަދި ކުށެއްގެ ތުހުމަތުގައި ހިފަހައްޓާ ނުވަތަ ހައްޔަރުކުރާ ކުދިންގެ ތެރެއިން ގާނޫނީ ވަކީލަކު ނުހޯދޭ ނަމަ އެ ކުދިންނަށް ދައުލަތުގެ ފަރާތުން ވަކީލެއްގެ އެހީތެރިކަން ފޯރު ކޮށްދޭންޖެހޭތީ، އެ އުސޫލުތައް ވެސް މި ގަވާއިދުގައި ހިމަނާފައިވާނެ ކަމަށް ބަންޑާރަ ނައިބުގެ އޮފީހުން ވިދާޅުވިއެވެ.
ދައުލަތުން ގާނޫނީ ވަކީލެއްގެ އެހީތެރިކަން ހޯދަން އެދި ހުށަހަޅާ އުސޫލުތަކާއި، ވަކީލުގެ އެހީތެރިކަން ފޯރުކޮށް ދޭ އިދާރާގެ ޒިންމާތަކާއި، ދައުލަތުގެ އިދާރާތަކުން އަމަލު ކުރަންޖެހޭ އިޖުރާއަތުތަކާއި، ވަކީލުގެ ޒިންމާތަކުގެ އިތުރުން ވަކީލުގެ އެހީތެރިކަން ފޯރު ކޮށްދިނުމުގެ އިންތިޒާމްތައް ގާއިމް ކުރުމާބެހޭ އުސޫލުތައް ވެސް ގަވައިދުގައި ހިމަނާފައިވެއެވެ.
