ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު އެޗްޕީއޭގެ ހުއްދައާ ނުލައި އއ. މަތިވެރިއަށް ދިއުމުން ޖޫރިމަނާ ކޮށްފިއެވެ.
ބަލިމަޑުކަމުގެ ސަބަބުން މާލެއިން ރަށްރަށަށް ދަތުރު ކުރުމަށް ހެލްތް ޕްރޮޓެކްޗަން އެޖެންސީ (އެޗްޕީއޭ) އިން އަޅާފައިވާ ފިޔަވަޅުތަކާ ހިލާފަށް އއ. މަތިވެރިއަށް ދިޔަ 11 މީހަކު މިއަދު ޖޫރިމަނާ ކޮށްފައިވާކަމަށް ފުލުހުންވެސްވަނީ ވިދާޅުވެފައެވެ.
މަޢުލޫމާތު ލިބޭގޮތުގައި މި 11 މީހުންގެ ތެރޭގައި ޖާބިރުވެސް ހިމެނެއެވެ. އެ މީހުން އެރަށަށް ދިޔަ ފަހުން މިހާރު ދެތިން ހަތަރު ދުވަސް ވެދާނެކަމަށްވެސް މަޢުލޫމާތު ލިބިއެވެ.
Today 11 people were fined for violating HPA guidelines and travelling to AA. Mathiveri without travelling permits from HEOC. We urge public to strictly follow all safety measures for your safety and that of others. 1/2
— Maldives Police (@PoliceMv) February 15, 2021
ޖޫރިމަނާ ކުރުމުގެ އިތުރުން ހުއްދަ ނުނަގާ ހުންނެވުމުން މަތިވެރިން ފޭބުމަށް އެ ރަށުގެ ޓާސްކްފޯހުން ޖާބިރަށް ވަނީ އަންގާފައެވެ.
އަދި މިއީ ހުއްދަ ނުނަގާ ޖާބިރު އެރަށް ދިޔަ ފުރަތަމަ ފަހަރު ނޫންކަމަށާއި، ރައްޔިތުންގެ ޝަކުވާ ބޮޑުވެ، މިމައްސަލާގައި ފިޔަވަޅު އަޅަން ނިންމީކަމަށްވެސް މަތިވެރި ޓާސްކްފޯހުގެ އޮފިޝަލަކުވަނީ ވިދާޅުވެފައެވެ.
ކޮވިޑްގެ ހާލަތުގެ ސަބަބުން ރަށްރަށަށް ދަތުރު ކުރާ ފަރާތްތަކުން ކުރިން 14 ދުވަހަށް ކަރަންޓީން ވާގޮތަށް އޮތް ނަމަވެސް ފަހުން އެ މުއްދަތު ވަނީ 10 ދުވަހަށް މަދުކޮށްފައެވެ. އެގޮތުން ރަށްރަށަށް ދާ ފަރާތްތައް ހާލު ބެލުން ޕޯޓަލް މެދުވެރިކޮށް އެޗްއީއޯސީ އާއި ކައުންސިލްގެ ހުއްދަ ނަގަން ޖެހެއެވެ.
