ކޮވިޑް-19 އާއި ގުޅިގެން ބުރެޒިލްގެ ސިއްހީ ނިޒާމު ފެއިލްވެ ބަލިމީހުންނަށް ހިދުމަތް ނުދެވޭނެ މިންވަރަށް ހާލަތު ގޯސްވެފައިވާކަމަށް އެގައުމުގެ ރަސްމީ އިދާރާތަކުން ހާމަކޮށްފިއެވެ.
މައުލޫމާތު ލިބޭގޮތުގައި ބުރެޒިލުގެ ބޮޑެތި ސްޓޭޓުތަކުގެ ތެރެއިން ދެ ސްޓޭޓް ފިޔަވައި ދެންހުރި ހުރިހާ ސްޓޭޓެއްގެ މައި ސިޓީގެ އައިސީޔޫ ބެޑުތަކުގެ 80 އިންސައްތަ މިހާރުވަނީ ފުރިފައެވެ.
ކޮވިޑް-19 ޖެހިގެން ބުރެޒިލުން މިހާތަނަށް 266،000 ވުރެ ގިނަ މީހުންވަނީ މަރުވެފައެވެ. އަދި މިބައްޔަށް ބުރެޒިލުން 11 މިލިއަން މީހުންވަނީ ޕޮޒިޓިވުވެފައެވެ.
ކޮވިޑް-19ގެ މުޅި ދުނިޔޭގެ ތަފާސްހިސާބަށް ބަލާއިރު ބުރެޒިލް އުޅެނީ މިބަލީގައި އެންމެ ގިނަ މީހުން މަރުވި ލިސްޓުގެ ދެވަނައިގައެވެ. މި ލިސްޓުގެ އެއްވަނައިގައިވަނީ އެމެރިކާއެވެ.
ބުރެޒިލްގެ ހާލަތު ކޮވިޑް-19 އާއި ގުޅިގެން ދުވަހެއް ދުވަހަކަށް ދަށަށް ދިޔަނަމަވެސް ބުރެޒިލްގެ ރައީސް އައްނަނީ ކޮވިޑް-19 އާއި ގުޅިގެން ހާއްސަ ފިޔަވަޅުތައް އަޅަން ދެކޮޅު ހަދަމުންނެވެ.
