އެއްދުވަސްތެރޭ ކޮވިޑް-19 ޖެހިގެން ބުރެޒިލުން 4،000 ވުރެ ގިނަމީހުން މަރުވެއްޖެއެވެ.
ކޮވިޑް-19ގެ ނުރައްކާތެރިކަން ބުރެޒިލްގައި ބޮޑުވެފައިވާއިރު އެގައުމުގެ ސިއްހީ ނިޒާމަށްވަނީ މިކަމުގެ ސަބަބުން ވަރަށް ބޮޑަށް ބާރުބޮޑުވެފައެވެ. މިގޮތުން ގިނައަދަދެއްގެ ބަލިމީހުން ސިއްހީ ފަރުވާ ނުލިބިދަނީ މަރުވަމުންނެވެ.
ބުރެޒިލްގައި ކޮވިޑް-19 ޖެހިގެން މަރުވިމީހުންގެ މުޅި ޖުމްލަ އަދަދު 337،000 އާއި ގާތްކޮށްފައިވާއިރު މިއީ މުޅިދުނިޔެއިންވެސް ދެވަނައަށް މިބަލީގައި މިހާގިނަ އަދަދަކަށް މީހުން މަރުވި ގައުމެވެ. އެންމެ ގިނަ އަދަދަކަށް މިބަލީގައި މީހުން މަރުވެފައިވަނީ އެމެރިކާއިންނެވެ.
ކޮވިޑް-19ގެ ހާލަތު ބުރެޒިލްގައި ދުވަހެއް ދުވަހަކަށް ގޯސްވަމުން ދިޔަނަމަވެސް ބުރެޒިލްގެ ރައީސް ޖައިރް ބޮލްސޮނާރޯ އައްނަނީ ބަލިކޮންޓްރޯލް ކުރުމަށް އެގައުމުގެ ސިއްހީ މަސައްކަތްތެރީން އަޅައިފައިވާ ފިޔަވަޅުތަކަށް ފާޅުގައި ދެކޮޅު ހައްދަވަމުންނެވެ. މިގޮތުން ގައުމު ފުރަބަންދު ކުރުންފަދަ ކަންކަމާއި ބޮލްސޮނާރޯ އައްނަނީ ދެކޮޅު ހައްދަވަމުންނެވެ.
ބޮލްސޮނާރޯ ވިދާޅުވަނީ ފުރަބަންދުގެ ސަބަބުން ގައުމުގެ އިގްތިސާދަށް ލިބޭ ގެއްލުން ކޮވިޑް-19 އަށްވުރެ ނުރައްކާވާނެ ކަމަށެވެ. މިގޮތުން ގިނަބަޔަކު ހާލުގައި ޖެހި މަރުވާ ނިސްބަތްވެސް އިތުރުވާނެ ކަމަށް ބޮލްސޮނާރޯ ވިދާޅުވެފައި ވެއެވެ.
ބުރެޒިލުން 13 މިލިއަނަށްވުރެ ގިނަމީހުން މިހާތަނަށްވަނީ ކޮވިޑް-19 އަށް ޕޮޒިޓިވުވެފައެވެ. އަދި ނިމިދިޔަ މާރޗްމަހު އެކަނިވެސް 66،570 މީހުންވަނީ މިބަލީގައި މަރުވެފައެވެ.
