މިހާރު ކުރިޔަށްދާ ލޯކަލް ކައުންސިލް ތަކުގެ އިންތިޚާބައި އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ އިންތިޚާބުގައި އެމްޑީޕީއައި ސަރުކަރުން ދަނީ ވޯޓަށް ނުފޫޒު ފޯރުވަމުން ކަމުގައި ޕްރޮގްރެސިވް ކޮންގްރެސް ކޯލިޝަނުން ވިދާޅުވެއްޖެއެވެ.
އެކޯލިޝަނުން މިއަދު ނެރެފައިވާ ބަޔާނެއްގައި ވިދާޅުވެފައި ވަނީ އިންސާފުވެރި އިންތިޚާބަކަށް ހުރަސް އަޅައި އަދި ޤާނޫނާ ޚިލާފަށް ވޯޓަށް
ނުފޫޒު ފޯރުވުމުގެ އެތައް ޢަމަލެއް ސަރުކާރު ހިންގަވަން ތިއްބެވި ފަރާތްތަކާ އެމްޑީޕީއިން ހިންގަވަމުން ގެންދަވާތީ މި ޣައިރު ޤާނޫނީ ޢަމަލުތައް
މިހާރުން މިހާރަށް ހުއްޓާލުމަށާއި، އިންތިޚާބީ ޙައްޤުތަށް ނަގައިލަން ހިންގާ މި ކަންކަން މިހާރުން މިހާރަށް ތަޙްޤީޤްކޮށްދިނުމަށް ދައުލަތުގެ
ކަމާބެހޭ މުއައްސަސާތަކަށް ގޮވާލާކަމަށެވެ.
އެގޮތުން އިދިކޮޅުން ވިދާޅުވީ ވޯޓުލުން ފެށިގެން ކުރިއަށް ދަނިކޮށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ތާއީދު ހޯދުމާ ކެމްޕެއިނުކުރުމުގައި ޢަމަލުކުރަން ޖެހޭ އުޞޫލުތަކާ ޚިލާފަށް ރާއްޖޭގެ ޤައުމީ މީޑިއާ މެދުވެރިކޮށް ވަކި ޕާޓީއެއްގެ ކެންޑިޑޭޓުންނަށް ކެމްޕޭނުކޮށްދެއްވާފައިކަމަށެވެ.
މީގެ އިތުރުން އެމްޑީޕީގެ ރައީސް މުޙައްމަދު ނަޝީދުއައި، އެ ޕާޓީގެ އިސް ވެރިންގެ އިތުރުން ޕާލިމެންޓްރީ ގްރޫޕްގެ މެންބަރުން ވޯޓުލާ މަރުކަޒުތަކުގެ ސަރަޙައްދުތަކުގައި ވަރަށް ފާޅުކަން ބޮޑުގޮތެއްގައި ޤާނޫނާ ޚިލާފަށް ކެމްޕޭން ހިންގާ، އިންތިޚާބަށް ނުފޫޒު ފޯރުވައި، ވޯޓުލާންދާ ފަރާތްތަކަށް ބިރުދެއްކުމުގެ ޢަމަލުތައް ތަކުރާރުކޮށް ހިންގަމުންދާކަމުގައިވެސް އެކޯލިޝަނުން ވިދާޅުވެފައިވެއެވެ.
އިދިކޮޅުން މިހެން ވިދާޅުވެފައި ވާއިރު، އިއްޔެ ހަވީރު 6:00 އިން ފެށިގެން ވޯޓް ލުމުގެ ކަންކަން ނިމެންދެން ކެމްޕެއިން ކުރުމަކީ މަނާކަމެކެވެ. ނަމަވެސް އިއްޔެވެސް ކެމްޕެއިން ކުރުން މަނާ ވަގުތުގައި ސޯޝަލް މީޑިއާ މެދުވެރިކޮށް ބައެއް ފަރާތްތަކުން ވަނީ ކެމްޕެއިން ކުރައްވާފައެވެ.
އޭގެ ތެރޭގައި ރައްޔިތުންގެ މަޖިލީހުގެ އެމްޑީޕީ ޕާލިމެންޓްރީ ގްރޫޕްގެ ލީޑަރ ޢަލީ އާޒިމްވެސް ހިމެނިވަޑައިގަންނަވެއެވެ.
