ކޮވިޑް-19 ޖެހިގެން ބުރެޒިލުން މަރުވި މީހުންގެ އަދަދު 400،000 އިން މައްޗަށް އަރައިފިއެވެ.
ބުރެޒިލުގެ ކަމާބެހޭ ފަރާތްތަކުން އިއްޔެ ހާމަކުރި ތަފާސްހިސާބުތައް ދައްކާގޮތުން އިއްޔެއާއި ހަމައަށް އައި އިރު އެގައުމުން ކޮވިޑް-19 ޖެހިގެން މަރުވި މީހުންގެ އަދަދުވަނީ 400،000 އިން މައްޗަށް އަރައިފައެވެ.
މިއީ މުޅި ދުނިޔޭގެ ކޮވިޑް-19ގެ ތަފާސްހިސާބައް ބަލާނަމަ އެއްގައުމުން ދެވަނައަށް އެންމެގިނަ މީހުން މިބަލީގައި މަރުވި ގައުމެވެ. މި ލިސްޓުގެ އެއްވަނައިގައި އުޅެނީ އެމެރިކާއެވެ. ކޮވިޑް-19 ޖެހިގެން އެމެރިކާއިން މަރުވި މީހުންގެ އަދަދު މިހާރު އުޅެނީ 580،000 ވުރެ މަތީގައެވެ.
ބުރެޒިލުން ކޮވިޑް-19 ޖެހިގެން މަރުވި މީހުންގެ ޖުމްލަ އަދަދުގެ ތެރެއިން ދެބައިކުޅަ އެއްބައި މީހުން މަރުވެފައިވަނީ 2021 ވަނަ އަހަރެވެ. ތަޖުރިބާކާރުން ލަފާކުރާ ގޮތުގައި އެގައުމުން މިހާގިނަ އަދަދެއްގެ މީހުން މިހާ ކުރު މުއްދަތެއްގެ ތެރޭގައި މަރުވެފައިވަނީ ކޮވިޑް-19ގެ ވޭރިއެންޓެއް ކަމަށްވާ ޕީ1 ވޭރިއެންޓުގެ ސަބަބުންނެވެ.
ޕީ1 ވޭރިއެންޓަކީ ބުރެޒިލުން ފެނިފައިވާ ކޮވިޑް-19ގެ ވޭރިއެންޓެކެވެ. މި ވޭރިއެންޓަކީ ކޮވިޑް-19ގެ އެހެނިހެން ވޭރިއެންޓުތަކަށްވުރެ ބާރަށް ފެތުރޭ އަދި ފުރާނައަށްވެސް ނުރައްކާތެރި ވޭރިއެންޓެކެވެ.
