ޑަޗަސް އޮފް ކެމްބްރިޖް ކޭޓް މިޑްލްޓަން ކޮވިޑް-19 ވެކްސިންގެ ފުރަތަމަ ޑޯޒް ޖައްސަވައިފިއެވެ.
ލަންޑަންގެ ސައިންސް މިއުޒިއަމްއަށް ވަޑައިގެން ވެކްސިން ޖައްސަވާ ފޮޓޯއެއް އާންމު ކުރައްވަމުން އުމުރުން 39 އަހަރުގެ ކޭޓް ވިދާޅުވީ، ވަރަށްބޮޑަށް ޝުކުރުވެރިވާ ކަމަށެވެ.
މީސްމީޑިއާ ވެބްސައިޓް ޓުވިޓާގައި ކޭޓް ވިދާޅުވެފައިވަނީ ވެކްސިން ދިނުމުގެ އެންމެހާ ކަންތައްތަކުގައި ހަރަކާތްތެރިވާ ފަރާތްތަކަށް ޝުކުރުވެރިވާ ކަމަށެވެ. ކޭޓްގެ ފިރިކަލުން ޑޫކް އޮފް ކެމްބްރިޖް ޕްރިންސް ވިލިއަމް ކޮވިޑް ވެކްސިންގެ ފުރަތަމަ ޑޯޒް ޖައްސަވައިފައިވަނީ މިމަހުގެ ކުރީކޮޅުއެވެ. ޝާހީ އާއިލާ ބޭފުޅުންގެ ތެރެއިން މިފަހުން ވެކްސިން ޖެހިކަން ހާމަކޮށްފައިވަނީ މި ދެބޭފުޅުންނެވެ.
Yesterday I received my first dose of the COVID-19 vaccine at London’s Science Museum. I’m hugely grateful to everyone who is playing a part in the rollout - thank you for everything you are doing. pic.twitter.com/h427iT0n4x
— The Duke and Duchess of Cambridge (@KensingtonRoyal) May 29, 2021
ހެލްތް ސެކެރެޓަރީ މެޓް ހެންކޮކް ބުނެފައިވަނީ، ފާއިތުވެދިޔަ ދެހަފްތާގެ ތެރޭ އިނގިރޭސިވިލާތުގެ އުމުރުން 30 އަހަރުގެ އާބާދީގެ ތެރެއިން ދެބައިކުޅަ އެއްބަޔަށްވުރެ ގިނަ މީހުން ވެކްސިން ޖަހައިފައިވާ ކަމަށެވެ.
ކޭޓް މިޑްލްޓަން ހިމެނިގެންދަނީ އިނގިރޭސިވިލާތުގައި ކޮވިޑް-19 ވެކްސިންގެ ފުރަތަމަ ޑޯޒް ޖެހި 39 މިލިއަނަށްވުރެ ގިނަ މީހުންގެ ތެރޭގައެވެ. މިހާތަނަށް އިނގިރޭސިވިލާތުގައި ކޮވިޑް-19 ވެކްސިންގެ ދެޑޯސް ޖެހި މީހުންގެ އަދަދު 24 މިލިއަނަށްވުރެ ގިނައެވެ.
