ހަރުކަށި ފިކުރުގެ 5 މީހުން ދޫކޮށްލި މައްސަލަ އިސްތިއުނާފް ކޮށްދިނުމަށް ޕްރޮސެކިއުޓަރ ޖެނަރަލްގެ އޮފީހަށް ހުށައަޅައިފިއެވެ.
ފުލުހުން ވިދާޅުވީ، ހަރުކަށި ފިކުރާ ދެކޮޅަށް ހިންގި އޮޕަރޭޝަންތަކުގައި އައްޑޫ އިން ހައްޔަރުކުރި މީހުންގެ ތެރެއިން 5 މީހުން ދޫކޮށްލަން ކޯޓުން ކުރި އަމުރު އިސްތިއުނާފް ކޮށްދިނުމަށް ޕްރޮސެކިއުޓަރ ޖެނަރަލްގެ އޮފީހުގައި ފުލުހުން ވަނީ އެދިފައިކަމަށެވެ.
ހަރުކަށި ފިކުރާއި ދެކޮޅަށް އައްޑޫ ސިޓީގައި ފުލުހުން ހިންގި އޮޕްރޭޝަންތަކުގައި ހައްޔަރުކޮށް ފުލުހުންގެ ބަންދުގައި ތިބި 8 މީހުންގެ ތެރެއިން 5 މީހެއްގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން އެމީހުން ދޫކޮށްލާފައި ވަނީ މިދިޔަ އާދިއްތަ ދުވަހުއެވެ.
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ދިން ޓެރަރިސްޓް ހަމަލާއަށްފަހު، ހަރުކަށި ފިކުރާދެކޮޅަށް ފުލުހުންނާއި ސިފައިން ގުޅިގެން ބޮޑު އޮޕަރޭޝަނެއް ވަނީ ފަށާފައެވެ. އަދި މި އޮޕަރޭޝަންގައި ގިނަ ބަޔަކު ވަނީ ހައްޔަރުވެސް ކޮށްފައެވެ.
މި އޮޕަރޭޝަންގައި ހަރުކަށި ފިކުރު ފެތުރުމުގައި އިސްކޮށް ހަރަކާތްތެރިވާކަމުގެ ތުހުމަތު ކުރެވޭ 49 އަހަރުގެ ދިވެހި ފިރިހެނަކު މާލެއިން ވެސް ވަނީ ހައްޔަރުކޮށްފައެވެ. ހައްޔަރުކޮށްފައިވަނީ, 2007 ވަނަ އަހަރު އއ. ހިމަންދޫގައި ހަރުކަށި ފިކުރު ފަތުރައި ސަލާމަތީ ބާރުތަކާ ދެކޮޅަށް ހަމަލާ ދިނުމުގައި އިސްކޮށް އުޅުނު މައްސަލާގައި ހައްޔަރުކޮށް ހުކުމް ތަންފީޒުކޮށްފައިވާ އަބްދުﷲ އަލިމަނިކެވެ.
މީގެ އިތުރުން ސިފައިން ވަނީ ހަތިޔާރާއެކު މާލެއާއި ރާއްޖޭގެ އެކި ސަރަހައްދުތަކުގައި ހަރަކާތްތެރިވެފައެވެ.
ރައީސް ނަޝީދަށް ދިން ޓެރަރިސްޓް ހަމަލާއާއި ގުޅިގެން މިހާތަނަށް ހައްޔަރުކޮށްފައިވަނީ ހަތަރު މީހެކެވެ. އެއީ ބޮންގޮއްވާލިކަމަށް ތުހުމަތުކުރެވޭ މީހާ ކަމަށްވާ އަދުހަމް އަހުމަދާއި މއ. ފޭރުގެ މުޖާޒް އަހްމަދު 21، އަދި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އެވެ. މީގެ އިތުރުން ލ. ގަން، ދުންފިނިއުފާ، އަޙްމަދު ފާތިޙްއެވެ.
