ހދ.ކުޅުދުއްފުށި، ހއ. ދިއްދޫ އަދި ރ. އުނގޫފާރުގެ މޮނިޓަރިން ހާލަތު އުވާލައިފިއެވެ.
ގިނަ ދުވަސްތަކަކަށް ފަހު ކުޅުދުއްފުށީގެ މޮނީޓަރިން އުވާލައިފައިވަނީ، މިދިޔަ މަހުގެ 24 އިން ފެށިގެން އެ ރަށް މޮނީޓަރިންގައި އޮތުމަށްފަހުއެވެ. އަދި ދިއްދޫ މޮނިޓަރިންގެ ހާލަތަށް ގެނެސްފައި ވަނީ މިދިޔަ ޖުލައި މަހު 26 ވަނަ ދުވަހުއެވެ. އަދި އުނގޫފާރު މޮނީޓަރިންގެ ހާލަތަށް ގެނެސްފައި ވަނީ މި މަހުގެ 2 ވަނަ ދުވަހުއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން، ވިދާޅުވީ މި ތިން ރަށް އާންމު ހާލަތަށް ގެނެސްފައިވަނީ އެ ރަށްރަށުން ނެގި ރެންޑަމް ސާމްޕަލްތަކުގެ ނަތީޖާތައް ނެގަޓިވް ވުމާ ގުޅިގެން ކަމަށެވެ.
މިވަގުތު މޮނިޓަރިންގެ ހާލަތުގައި އޮތީ 11 ރަށެކެވެ. އެއީ ހއ. ތަކަންދޫ، ށ. ފޯކައިދޫ، ށ. ފީވައް، މ. ކޮޅުފުށި، ރ. ދުވާފަރު، ކ ކާށިދޫ، ދ. ކުޑަހުވަދޫ، ލ. ފޮނަދޫ، އއ. ހިމަންދޫ އަދި ގދ. ނަޑެއްލާ އާއި ތ. ހިރިލަންދޫއެވެ.
މިހާތަނަށް އެންމެ ގިނަ ދުވަސްވަންދެން މޮނީޓަރިންގައި އޮތް ރަށަކީ ރ. ދުވާފަރެވެ. އެ ރަށް މޮނީޓަރިން އަށް ލައިފައިވަނީ މެއި މަހުގެ 25 ގައެވެ.
