މިއަހަރުގެ ފުރަތަމަ 6 މަސްދުވަސް ނިމުނުއިރު ރާއްޖޭގެ ރަސްމީ ރިޒާވުގައި 832 މިލިޔަން ޑޮލަރު ހުރިކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސްހިސާބުތަކުން ދައްކައިފިއެވެ.
އެމްއެމްއޭއިން ނެރެފައިވާ އެންމެ ފަހުގެ ތަފާސްހިސާބުތަކުން ދައްކާގޮތުގައި، ޖޫން މަހުގެ ނިޔަލަށް ރަސްމީ ރިޒާވުގައި 832.4 މިލިޔަން ޑޮލަރު ހުރިއިރު، މިއީ މެއި މަހާ އަޅާބަލާއިރު 2 އިންސައްތައިގެ ކުރިއެރުމެކެވެ. މެއި މަހު ރަސްމީ ރިޒާވުގައި ހުރީ 815.8 މިލިޔަން ޑޮލަރެވެ.
ނަމަވެސް ރަސްމީ ރިޒާވަށް ކުރިއެރުން ލިބިފައިވީ ނަމަވެސް، ބޭނުންކުރެވޭ ރިޒާވް ވަނީ 6.8 އިންސައްތަ ދަށްވެފައެވެ. އެގޮތުން ޖޫން މަހުގެ ނިޔަލަށް ބޭނުންކުރެވޭ ރިޒާވުގައި ހުރީ 203 މިލިޔަން ޑޮލަރު ކަމަށްވާއިރު، މެއި މަހު މި އަދަދު ހުރީ 217.9 މިލިޔަން ޑޮލަރުގައެވެ.
ބޭނުންކުރެވޭ ރިޒާވް ދަށްވެފައިވަނީ ކުރު މުއްދަތަށް ދައްކަންޖެހޭ ބޭރުފައިސާގެ އިލްތިޒާމުތައް އިތުރުވުމާ ގުޅިގެންނެވެ. މި އިލްތިޒާމުތަކަށް މެއި މަހު 742.5 މިލިޔަން ޑޮލަރު ދައްކާފައިވާއިރު، ޖޫން މަހު އެ އަދަދު 774.5 މިލިޔަން ޑޮލަރަށް އިތުރުވެފައިވެއެވެ.
ދައުލަތުގެ ރިޒާވް ހަރުދަނާކުރުމަށް ސަރުކާރުން ވަނީ ބޭރުފައިސާއާ ބެހޭ އައު ޤާނޫނެއް ތަޢާރަފްކޮށްފައެވެ. މި ޤާނޫނުގެ ދަށުން ފަތުރުވެރިކަމުގެ ދާއިރާގެ ވިޔަފާރިތަކުން އާމްދަނީގެ 20 އިންސައްތަ ނުވަތަ ފަތުރުވެރިއެއްގެ ބޮލަކަށް ޖެހޭ ނިސްބަތުން ބޭންކުތަކަށް މާރުކުރަން ޖެހެއެވެ. އަދި ބޭންކުތަކަށް މާރުކުރާ ޑޮލަރުގެ 90 އިންސައްތަ އެމްއެމްއޭއަށް ވިއްކަންޖެހޭނެއެވެ.
އެމްއެމްއޭއިން މި ފައިސާގެ 60 އިންސައްތަ ބޭނުންކުރަނީ ސަރުކާރުގެ އެކި ބޭނުންތަކަށާއި ރިޒާވް އިތުރުކުރުމަށެވެ. އަދި އިތުރު 30 އިންސައްތަ ކޮންމެ ހަފްތާއަކު ބޭންކުތަކަށް ވިއްކައި، އެ ފައިސާ ވިޔަފާރިތަކަށް ދޫކުރުމަށާއި އެހެނިހެން ބޭރުފައިސާގެ އިލްތިޒާމުތައް އަދާކުރުމަށް ބޭނުންކުރެވެއެވެ.
