މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ހާމަކުރި ތަފާސްހިސާބުތަކުން ދައްކާގޮތުގައި މިދިޔަ ހަފްތާގައި މަސްވެރިން ކިރުވި މަހަށް 9.3 މިލިޔަން ރުފިޔާ ދޫކޮށްފިއެވެ.
މިފްކޯގެ ތަފާސްހިސާބުތަކުން ދައްކާގޮތުން، މިދިޔަ ހަފްތާގައި 218 ދޯންޏަކުން މަސްކިރުވާފައިވެއެވެ. މިއީ އޭގެ ކުރީ ހަފްތާގައި މަސްކިރުވި 340 ދޯނީގެ އަދަދާ އަޅާބަލާއިރު 35.8 އިންސައްތައިގެ ދަށްވުމެކެވެ. އަދި މަސްވެރިންނަށް ދޫކުރެވުނު ފައިސާގެ އަދަދުވެސް ވަނީ 43.4 އިންސައްތަ ދަށްވެފައެވެ. އޭގެ ކުރީ ހަފްތާގައި މަސްވެރިންނަށް ދޫކޮށްފައިވަނީ 16.6 މިލިޔަން ރުފިޔާއެވެ.
މޯލްޑިވްސް މަނިޓަރީ އޮތޯރިޓީގެ މަންތްލީ ސްޓެޓިސްޓިކްސް ރިޕޯޓުން ދައްކާގޮތުގައި މިއަހަރުގެ ފުރަތަމަ 7 މަސްދުވަހު ރާއްޖެއިން 52,763 މެޓްރިކް ޓަނުގެ މަސް އެކްސްޕޯޓްކޮށްފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 88.8 އިންސައްތައިގެ އިތުރުވުމެކެވެ. މީގެ ތެރެއިން ތާޒާ އަދި ފިނިކުރި ކަނޑުމަހުގެ ގޮތުގައި 47,902 މެޓްރިކް ޓަނުގެ މަސް އެކްސްޕޯޓްކޮށްފައިވާއިރު، މިއީ މިދިޔަ އަހަރާ އަޅާބަލާއިރު 106.2 އިންސައްތައިގެ ކުރިއެރުމެކެވެ.
ރާއްޖޭގެ މަސްވެރިކަމުގެ ސިނާއަތް ކުރިއެރުވުމަށް ސަރުކާރުން ދަނީ ގިނަގުނަ މަސައްކަތްތަކެއް ކުރަމުންނެވެ. މިގޮތުން މަސް ޕްރޮސެސިންގ ކެޕޭސިޓީ އިތުރުކޮށް، މަސް ރައްކާކުރުމުގެ ޤާބިލުކަން އިތުރުކުރުމަށް މަސައްކަތްތަކެއް ކުރެވެމުންދެއެވެ. މަސްވެރިކަމާބެހޭ ވުޒާރާއިން ހާމަކުރިގޮތުގައި ސަރުކާރުގެ އަމާޒަކީ 3 އަހަރު ތެރޭގައި މަސް ޕްރޮސެސިންގ ކެޕޭސިޓީ 9 ގުނަ އިތުރުކުރުމެވެ.
މީގެއިތުރުން، ޒުވާނުން މަސްވެރިކަމުގެ ދާއިރާއަށް ޝައުޤުވެރިކުރުވުމަށްޓަކައި ޚާއްސަ ތަމްރީނު ޕްރޮގްރާމްތަކެއް މިހާރު ވަނީ ފަށާފައެވެ. މިއީ މަސްވެރިކަމުގެ ސިނާއަތުން ލިބޭ އާމްދަނީ އިތުރުކޮށް، އިޤްތިޞާދީ ގޮތުން މި ދާއިރާގެ ހިއްސާ އިތުރުކުރުމަށް އަމާޒުކޮށްގެން ކުރެވޭ މަސައްކަތްތަކުގެ ތެރެއިން ބައެކެވެ.
