ނަގުދު ފައިސާ ބޭނުންކުރުން މަދުކުރުމަށް ޑިޖިޓަލް ކަރަންސީ ރާއްޖެެއަށް ތަޢާރަފްކުރުމަކީ އަމާޒެއްކަމަށް އެމްއެމްއޭގެ ގަވަރުނަރު އަހުމަދު ނަސީރު ވިދާޅުވެއްޖެއެވެ. 

އެމްއެމްއޭގެ ގަވަރުނަރު ނަސީރު މިހެން ވިދާޅުވީ މޯލްޑިވްސް މަނިޓަރީ އޮތޯރިޓީ، އެމްއެމްއޭގެ 38 ވަނަ އަހަރީ ޖަލްސާގައި ވާހަކަފުޅުދައްކަވަމުންނެވެ.

ދައުލަތުގެ ވަޒީރުންނާއި އެކި މުއައްސަސާތަކުގެ އިސްވެރިންގެ ބައިވެރިވެޑައިގަތް، އެމްއެމްއޭގެ 38 ވަނަ އަހަރީ ދުވަސް ފާހަގަކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވީ ކުރީގެ ރައީސް އަދި އެމްއެމްއޭގެ އެންމެ ފުރަތަމަ ގަވަރުނަރު، އަލްއުސްތާޛް މައުމޫން އަބްދުލް ޤައްޔޫމްއެވެ.

މާލީ ދާއިރާ ކުރިއެރުވުމަށް އެމްއެމްއޭއިން ގިނަ މަސައްކަތްތައް ކުރަމުންދާއިރު ޓެކްނޮލޮޖީގެ ބޭނުންކޮށްގެން މާލީ ނިޒާމަށް ކުރިއެރުން ހޯދަންޖެހޭކަމަށް ޖަލްސާގައި ވާހަކަފުޅުދައްކަވަމުން އެމްއެމްއޭ ގަވަރުނަރު އަހުމަދު ނަސީރު ވިދާޅުވިއެވެ.

އެގޮތުން ޑިޖިޓަލް ކަރަންސީ ރާއްޖެއަށް ތަޢާރަފްކޮށް މި ރޮނގުން ކުރިއެރުން ހޯދުމަކީ ބޭންކުގެ އަމާޒެއްކަމަށާއި، އެ މަސައްކަތުގެ ދަށުން މިހާރު ކުރަމުންދަނީ މޯލްޑިވްސް ޕޭމެންޓް ސިސްޓަމްގެ މަސައްކަތްކަމަށް އޭނާ ވިދާޅުވިއެވެ. އަދި އަންނަ އަހަރު މި މަސައްކަތް އެއްކޮށް ނިންމާލެވުމާއެކު ޑިޖިޓަލް ކަރަންސީއަށް ވާސިލްވުމަށް ފަސޭހަވެގެންދާނެކަން ނަސީރު ފާހަގަކުރެއްވިއެވެ.

"މާލީ ދާއިރާއަށް އަންނަ ތަރައްޤީއަށް އަހުލުވެރިވުމަށް އެމްއެމްއޭއިން ދަނީ މަސައްކަތްކުރަމުން. ޒަމާނީ ވިސްނުން ހުރީ ޑިޖިޓަލް ކަރަންސީއާ ދިމާއަށް. އެމްއެމްއޭގެ އަމާޒަކީ ޓެކްނޮލޮޖީގެ ރޮނގުން ކުރިއެރުން ހޯދައި އިންޤިލާބީ އަދި އީޖާދީ ބަދަލުތައް މި ދާއިރާއަށް ގެނައުން. އަޅުގަނޑުމެން އެންމެ އިސްކަމެއްދީގެން ކުރިއަށްގެންދާ އެއް މަޝްރުޢުއަކީ މޯލްޑިވްސް ޕޭމެންޓް ސިސްޓަމް ޕްރޮޖެކްޓް. މި މަޝްރުޢުގެ ތެރެއިން ދިވެހިރާއްޖޭގައި ފައިސާގެ މުޢާމަލާތްކުރުމުގައި ނަގުދު ފައިސާއަށް ބަރޯސާވާން ނުޖެހި ފައިސާ ބޭނުންކުރުމުގެ މަގުފަހިވެގެންދާނެ. އަޅުގަނޑުމެންގެ އަމާޒަކީ އަންނަ އަހަރު މި ޕްރޮޖެކްޓްތައް ނިންމާ ރައްޔިތުންނަށް ލުއި ފަސޭހަ ގެނައުން." ގަވަރުނަރު ނަސީރު ވިދާޅުވިއެވެ. 

މޯލްޑިވްސް ޕޭމެންޓް ސިސްޓަމަކީ ފައިސާގެ އެކި މުޢާމަލާތްތަކުގައި ނަގުދު ފައިސާ ބޭނުންކުރެވޭ މިންވަރު މަދުކޮށް ފައިސާ ދެއްކުމުގައި ދިމާވާ ދަތިތައް ދެނެގަނެ، ފަސޭހަ ނިޒާމަކުން ފައިސާދެއްކޭނެ އިންތިޒާމު ހަމަޖެއްސުމަށްޓަކައި އެމްއެމްއޭއިން އެކުލަވާލާފައިވާ ސިސްޓަމެކެވެ.

މާލީ ދާއިރާ ކުރިއެރުވުމަށް ކުރާ މަސައްކަތްތަކާއިއެކު މާލީ ނިޒާމުގެ ހަމަޖެހުން ޤާއިމްކުރުމަށް އެމްއެމްއޭއިން މަސައްކަތްކުރަން ޖެހޭ ކަމަށް ގަވަރުނަރު ވިދާޅުވިއެވެ. ގަވަރުނަރު ވިދާޅުވީ އެމްއެމްއޭއަށް ގެންނަންޖެހޭ ބަދަލުތައް ގެނެސް މަރުކަޒީ ބޭންކް ހަރުދަނާކުރުމުގެ މަސައްކަތްކުރަމުންދާކަމަށެވެ.

ޖަލްސާ ޝަރަފުވެރިކޮށްދެއްވާ ވާހަކަފުޅުދައްކަވަމުން ކުރީގެ ރައީސް މައުމޫން ވިދާޅުވީ ފާއިތުވި 38 އަހަރުގައި އެމްއެމްއޭއިން ފާހަގަކޮށްލެވޭ ކާމިޔާބީތައް ހާސިލްކޮށްފައިވާކަމަށާއި، މިއަދު ދިވެހި ފައިސާގެ އަގު ވަކި މިންވަރެއްގައި ހިފެހެއްޓިފައި ވަނީ ފާއިތުވި އަހަރުތަކުގައި ކުރި މަސައްކަތުންކަމަށެވެ. މީގެ ސަބަބުން ބައިނަލްއަޤްވާމީ ގިނަ ޤައުމުތަކުން ރާއްޖޭގެ އިޤްތިސާދަށް ކުރާ އިތުބާރަކީވެސް މިކަމުގެ ނަތީޖާއެއްކަމަށް ރައީސް މައުމޫން ވިދާޅުވިއެވެ

"އެމްއެމްއޭގެ އުމުރުން 38 އަހަރު ފުރޭ ދުވަހު އެމްއެމްއޭގެ ސަބަބުން ދިވެހި ފައިސާގެ އަގު ހިފެހެއްޓިފައިވާ ހަރުދަނާކަން އެއި ބައިނަލްއަޤްވާމީ ގޮތުން ވެސް ރާއްޖެއަށް ތަޢުރީފު ލިބޭ ގޮތް ވަނީ ވެފައި އަދި ބޭރު ޤައުމުތަކުގެ އިތުބާރުވެސް އެމްއެމްއޭއިން ވަނީ ހޯދާފަ." ރައީސް މައުމޫން ވިދާޅުވިއެވެ.