ހުޅުމާލޭގައި ތަރައްޤީކުރަމުންދިޔަ އިމާރާތެއްގެ މަތިން ސިމެންތި ބަސްތާއެއް ބޮލަށް ވެއްޓި ބަންގުލަދޭޝަގެ ޒުވާނަކު ނިޔާވި ޚަބަރާއެކު ދިވެހިންނަށް ސިހުން ގެނުވިއެވެ. މީގެ ކުޑަ ދުވަސްކޮޅެއް ކުރިންވެސް މާލޭގައި އިމާރާތެއްގެ މަތިން ވެއްޓުނު ސިމެންތި ބަސްތާއަކުން ޖެހި ބަންގުލަދޭޝްގެ ކުޑަ އަންހެން ކުއްޖަކު ނިޔާވި ޚަބަރުވެސް އިވިފައި ހުރުމާއެކުގައެވެ.
އެއްގޮތަކަށް ދެ ހާދިސާއެއް ހިނގައި ދެމީހަކު ނިޔާވި ޚަބަރާއެކު ދިވެހި މީޑިއާ ގުގުމާލިއެވެ. ނަމަވެސް އެއީ ހާދިސާ ހިނގި ގޮތް ނޫންކަން ސާފުވެފައި މިވަނީ މިއަދުއެވެ. ފުލުހުން މިއަދު ވިދާޅުވީ، އިއްޔެ އެގޮތަށް މަޢުލޫމާތު ހިއްސާކުރެވުނީ އޭރު ލިބުނު މަޢުލޫމާތުގެ ކުށެއްގެ ސަބަބުން ކަމަށެވެ.
ފުލުހުން މިއަދު ހެނދުނު ވިދާޅުވީ، އިމާރާތުގެ މަތިން ސިމެންތި ކޮތަޅެއް ވެއްޓުނީ ނޫންކަމަށާއި، ޑަބަލްކޮށް ޖަހާފައިހުރި ޖަމްބޯ ބޭގްތަކެއްގެ ތެރެއިން، މަތީގައި އޮތް ޖަމްބޯ ބޭގްގެ ތެރެއިން ސިމެންތި ކޮތަޅެއް ނަގަން އުޅުމުގެ ތެރޭގައި އެ ޖަމްބޯ ބޭގް ތެރޭގައި ހުރި ސިމެންތި ބަސްތާތަކާއެކު އެ ޖަމްބޯ ބޭގް އޭނާގެ ބޯ މައްޗަށް ވެއްްޓުމުން ލިބުނު އަނިޔާތަކުގެ ސަބަބުން އެ ޒުވާނާ ނިޔާވެފައިވާ ކަމަށެވެ.
މިކަމާ ގުޅިގެން ސުވާލު ދެންނެވުމުން ހާދިސާ ހިނގި ކޮންސްޓްރަކްޝަން ސައިޓްގެ ވެރިފަރާތް ކަމަށްވާ، ޖާހް އިންވެސްޓްމަންޓުގެ އިސް ބޭފުޅަކު ވިދާޅުވީ، ހާދިސާ ހިނގާފައިވަނީ އެ ކޮންސްޓަރްކަޝަން ސައިޓް ތެރޭގައި ވަކިން ހަދާފައި ހުރި ސިމެންތި ގުދަނެއްގެ ތެރޭގައި ކަމަށެވެ.
މިކަމާ ގުޅޭގޮތުން އެޗްޑީސީ އިން ވިދާޅުވީ، އެމީހާ ބޮލަށް ސިމެންތި ބަސްތާތަކެއް އަރިއަޅާލީ ފަސްވަރަކަށް ފޫޓް މަތިން ކަމަށާއި، ހިތާމަވެރި އެ ހާދިސާ ހިނގީ ޖެނެރަލް ސޭފްޓީގެ މައްސަލައެއް ދިމާވެގެން ނޫން ކަމަށެވެ.
ޖާހް އިންވެސްޓްމަންޓުގެ އިސް ފަރާތަކުން ވިދާޅުވީ، ހާދިސާ ހިނގި ސިމެންތި ގުދަނުގައި ސިމެންތި ޖަމްބޯ ޖަހާފައިހުރީ ގާތްގަނޑަކަށް ފަސް ފޫޓުގެ އުސްމިނުގައި ކަމަށާއި، ހާދިސާ ހިނގާފައިވަނީ އެންމެ ތިރީގައި އޮތް ސިމެންތި ބަސްތާ ނަގަން ބިދޭސީ މީހާ ގުދުވި ގަޑީގައި މަތީގައި ހުރި ސިމެންތި ޖަމްބޯ އޭނާގެ ގައިމައްޗަށް އަރިއަޅާލުމުން ލިބުނު އަނިޔާތަކުގެ ސަބަބުން ކަމަށެވެ.
ހާދިސާ ހިނގި ވަގުތު ނިޔާވި ބިދޭސީ މީހާވެސް ސަލާމަތީ ގޮތުން ފުރިހަމަކުރަންޖެހޭ ކަންކަން ފުރިހަމަ ކޮށްފައިވާ ކަމަށާއި، ހެލްމެޓްވެސް އަޅައިގެން ހުރިކަމަށް ޖާހް އިންވެސްޓްމަންޓުން ވިދާޅުވިއެވެ. އަދި އެ މަސައްކަތުގެ ސައިޓުގައި ސަލާމަތީ ފިޔަވަޅުތައް ވަރަށް ރަނގަޅަށް ބަލަހައްޓަމުންދާ ކަމަށްވެސް އެފަރާތުން ވިދާޅުވިއެވެ.
މި މައްސަލަ ފުލުހުން ތަޙްޤީޤު ކުރަމުންދާ ކަމަށާއި، އެހެންކަމުން ތަޙްޤީޤަށް ހުރަސް އެޅިދާނެތީވެ ހުރިހާ ތަފްސީލެއް ހާމަކުރެވެން ނެތްކަމަށްވެސް އެ ކުންފުނިން ވިދާޅިވެއެވެ.
އިއްޔެ ހަވީރު ހިނގި މި ހާދިސާގެ ޚަބަރުތައް ހަޤީޤަތާ ޚިލާފަށް މީޑިއާތަކުގައި ގެނެސްދެވިފައިވަނީ ފުލުހުންނަށް ލިބުނު މަޢުލޫމާތުގެ ކުށެއްގެ ސަބަބުން ފުލުހުން ފޮރުކޮށްދިން މަޢުލޫމާތުގެ މައްސަލައަކުންނެވެ. އެކަން އިސްލާޙްކޮށް ފުލުހުން މިއަދު ވަނީ މީޑިއާތަކަށްވެސް އަލުން މަޢުލޫމާތު ފޯރުކޮށްދީފައެވެ.
ކޮންމެއަކަސް މަސައްކަތު ސައިޓެއްގައި ހިނގި ހިތާމަވެރި ހާދިސާއެއްގައި ބަންގްލަދޭޝްގެ ޒުވާނަކު މިވަނީ ނިޔާވެފައެވެ. މައްސަލައިގެ އެންމެ ފުނަށް ފީނުމަށް ފުލުހުން ކުރަމުންދާ މަސައްކަތް ނިމުމުން އިތުރަށް މި ހާދިސާގެ ތަފްސީލުތައް ދިވެހި ރައްޔިތުންނަށް ހާމަވެގެންދާނެކަމަށް ބެލެވެއެވެ.
