މާލޭގެ ގެއެއްގެ ވައިގޮޅިއަށް ރޭ ވެއްޓުނު އުމުރުން ދުވަސްވީ އަންހެންމީހާ ނިޔާވެއްޖެއެވެ.

މާލޭ، މާފަންނު ގެއެއްގެ ހަތަރުވަނަ ފަންގިފިލާއިން ވައިގޮޅިއަށް އުމުރުން ދުވަސްވީ އަންހެނެއް ވެއްޓިގެން ފުލުހުންނަށް ރިޕޯޓްކޮށްފައިވަނީ ރޭ މެންދަމު 01:33 ހާއިރުއެވެ.

އެ މީހާއަށް ފަރިވާދެމުންދިޔައީ އިންދިރާގާންދީ މެމޯރިއަލް ހޮސްޕިޓަލުގައެވެ. އެ ހޮސްޕިޓަލުން ވަނީ އުމުރުން 76 އަހަރުގެ އެ އަންހެން މީހާ ނިޔާވެފައިވާކަން "ފެށުން އޮންލައިން" އަށް ކަށަވަރުކޮށްދީފައެވެ.

އައިޖީއެމް ހޮސްޕިޓަލްގެ މީޑިއާ އޮފިޝަލް މި ނޫހަށް ވިދާޅުވީ، އެ ހޮސްޕިޓަލްގެ އިމަޖެންސީ ރެސްޕޮންސް (އީއާރު) ގައި ފަރުވާދެމުންދަނިކޮށް އެ އަންހެންމީހާ ނިޔާވިކަމުގެ މަޢުލޫމާތު ލިބިފައިވަނީ މިއަދު މެންދުރުފަހު 01:30 ހާއިރު ކަމަށެވެ.

ރޭ މެންދަމު ހިނގި ހިތާމަވެރި މި ހާދިސާގައި 76 އަހަރުގެ ދިވެހި އަންހެން މީހާއަށް ބޮޑެތި އަނިޔާތަކެއް ލިބިފައިވާއިރު، އެ މީހާގެ ބޮލުގެ ފުށްކިބަ ފަޅައިގެންގޮސް، ކަނާތު ފައި ފަލަމަސްގަނޑާ ހަމައިން ބިނދިފައިވާއިރު، ވާއަތު ފައިގެ ކުޑަހުޅުން ވަނީ ބިނދިފައެވެ.

މި އަންހެންމީހާ ވައިގޮޅިއަށް ވެއްޓުނު މައްސަލަ މޯލްޑިވްސް ޕޮލިސް ސަރވިސް އިން ދަނީ އިތުރަށް ތަޙްޤީޤު ކުރަމުންނެވެ.