މިދިޔަ އަހަރު ޑިސެންބަރު މަހުގެ 17 ވަނަ ދުވަހު އިމާރާތަކުން ވެއްޓުނު ސިމެންތި ބަސްތާއަކުން ޖެހި މަރުވި ރައުޝަން ޖިއާންގެ މަރުގެ މައްސަލާގައި އޭނާގެ މައިންބަފައިން ކުރިމިނަލް ކޯޓްގައި އިއްޔެ ހެކިބަސް ދީފިއެވެ.
ކުރިމިނަލް ކޯޓްގައި ބޭއްވި އަޑުއެހުމުގައި އޭނާގެ މަންމަ ޑރ. ހުސައިންއާއި، ބައްޕަ މުޙައްމަދު ކަމާލުއްދީން ހެކިބަސް ދީފައިވާއިރު، ޖިއާންގެ މަރާ ގުޅޭގޮތުން "ކްރައިމްސީން ރިކޮންސްޓްރަކްޝަން ރިޕޯޓު" ތައްޔާރުކުރި ފުލުސް އޮފިސަރ މުހައްމަދު ސަލީމްވެސް ވަނީ ހެކިބަސްދީފައެވެ.
ޖިއާންގެ މަރުގެ މައްސަލާގައި ދައުލަތުން ވަނީ 6 މީހަކަށް ދަޢުވަ ކޮށްފައެވެ. އޭގެ ތެރޭގައި އިންޑިއާގެ ހަތަރު މީހަކާއި ދެ ދިވެއްސެއް ހިމެނެއެވެ.
ޖިއާންގެ މަންމަ ކިޔައިދިން ގޮތުގައި ސައިބުއިމަށްފަހު ނަލަހިޔާ ސަރަހައްދަށް ދިޔައީ އިމިގްރޭޝަނަށް ބޭނުންވާ ފޮޓޯއެއް ނަގަންޖެހޭތީ ފޮޓޯ ނަގާ ތަނެއް ހޯދަމުން ކަމަށާއި އެވަގުތު ޖިއާންގެ ބައްޕައާއި 3 އަހަރުގެ ފިރިހެން ކޮއްކޮވެސް އެކުގައި ދިޔަކަމަށެވެ.
ޖިއާންގެ އަތުގައި މަންމަ ހިފައިގެން ދިޔަ އިރު ބައްޕަ ގާތަށް ދިއުމަށް އޭނާ ޝަކުވާ ކުރަމުން ދިޔަ ކަމަށާއި، ޖިއާން ޝަކުވާ ކުރާ ވަރުން ކުޑަ ވަގުތުކޮޅަކަށް އޭނާގެ އަތުން ދޫކޮށްލި ކަމަށް ޖިއާންގެ މަންމަ ބުނެފައިވެއެވެ. ސިމެންތި ބަސްތާ ވެއްޓުނުއިރު އެއްވެސް އަޑެއްވެސް ނީވޭ ކަމަށާއި އެވަގުތު ޖިއާން ހުރީ އޭނާގެ ބައްޕަ ކައިރީގައި ކަމަށް ހީކުރެވުނު ކަމުގައިވެސް ޖިއާންގެ މަންމަ ބުންޏެވެ. ނަމަވެސް ވާނުވާ އެނގުނު އިރު ޖިއާން އޮތީ ސިމެންތި ބަސްތާ ދަށުވެ ހޭނެތިފައި ކަމަށް އޭނަ ބުނެފައިވެއެވެ.
ޖިއާންގެ މައިންބަފައިން ކިޔައިދިން ގޮތުގައި އެ ހާދިސާ ހިނގި ސަރަހައްދުގައި ސަލާމަތީ ފިޔަވަޅުތައް އަޅާފައިއެއް ނުވެއެވެ. އަދި ނުރައްކަލެއް ކުރިމަތިވެދާނެ ކަމުގެ އިންޒާރު ދޭނެ މީހަކުވެސް އެ ދުވަހު އެތަނުގައި ނެތެވެ.
ހާދިސާ ހިނގި ގޮތް އަންދާޒާ ކުރުމަށްޓަކައި ހުޅުމާލޭގައި ހުންނަ ފުލުހުންގެ އިމާރާތެއްގެ ފަންގި ފިލާތަކުން ތަފާތު އެކި ބަރުދަނުގެ ބަސްތާ އެކި އުސްމިނުގައި ވައްޓާލައި އެ އުސްމިން ތަކުން ބަސްތާ ވެއްޓުމުން ޖެހޭ ބާރުމިން އަންދާޒާ ކޮށްފައިވެއެވެ.
ޖިއާން ވެއްޓިފައި އޮއްވައި ނަގައިގެން ދިޔައީ އޭނާގެ ބައްޕަ ކަމަށް ޖިއާންގެ މަންމަ ބުންޏެވެ.
