ހއ. ބާރަށުގެ އެއް އާއިލާއަކަށް ނިސްބަތްވާ ދެ މީހަކު އިއްޔެ ނިޔާވި އިރު، އެތަނުން އެކެއްގެ މަރާމެދު ސުވާލު އުފެދޭ ކަންކަން ހުރުމުން އެކަން ތަހުގީގު ކުރަަމުން އަންނަ ކަމަށް ފުލުހުން ވިދާޅުވެއްޖެއެވެ.
އިއްޔެ ހެނދުނު ކުއްލި ގޮތަކަށް ނިޔާވެފައިވަނީ ބާރަށު ފާތިމަތު މޫސާ އާއި އޭނާގެ ފިރިމީހާގެ އެއްބަނޑު އެއްބަފާ މީހެއްގެ ދަރިއެއްކަމަށްވާ އަލީ މުހައްމަދު (އަލި މަނިކު) އެވެ.
ފުލުހުން ވިދާޅުވީ، އާއިލާގެ ފަރާތުން ފުލުހުންނަށް ހުށަހެޅުމުން އަލި މަނިކުގެ މަރުގެ މައްސަލަ ތަހުގީގު ކުރަމުން އަންނަ ކަމަށާއި، ނަމަވެސް އެމައްސަލައިގައި މިހާތަނަށް އެއްވެސް މީހަކު ހައްޔަރުކޮށްފައި ނުވާކަމަށެވެ.
މަޢުލޫމާތު ލިބިފައިވާ ގޮތުގައި އަލީ މުހައްމަދުގެ ހަށިގަނޑު ފެނުން އިރު މޫނުމަތީގައި ޒަޚަމްތަކެއް ހުއްޓެވެ. އެގޮތުން ކޯމަތީގައި ތަންކޮޅެއް ހަލާކުވެފައި ހުރި އިރު ނޭފަތުގެ ކަށިގަނޑު މަތިންވެސް ވެސް ތަނެއް ހަލާކުވެފައި ހުއްޓެވެ.
ނަމަވެސް އައިޖީއެމްއެޗުން ދީފައިވާ މަރު ފޯމުގައި ހަމައެކަނި ލިޔެފައިވަނީ ''ހޮސްޕިޓަލަށް ގެނައި އިރުވެސް މަރުވެފައިވާކަމަށް'' ށެވެ. އަދި އެމީހާގެ ހަށިގަނޑު އައިޖީއެމް ހޮސްޕިޓަލަށް ގެންދިޔައީ ކާކުކަން އަދިވެސް ނޭނގޭކަމަށްވެސް އާއިލާއިން ބައެއް މީޑިއާތަކަށް ބުނެފައިވެއެވެ.
އަލީ މުހައްމަދު އުޅޭ ގޭގެ އަންހެންމީހާއާއި ފުލުހުން ސުވާލުކުރުމުން ބުނެފައިވަނީ، އަލީ މުހައްމަދު އޮފީހަށް ދާން ނުތެދުވުމުން ކޮޓަރިއަށްވަދެ ގޮވިއިރު އޮތީ އެނދުމަތީގައި ބަންޑުން ކަމަށާއި ހަބަރެއް ނުވުމުން ފުރޮޅާލިއިރު މަރުވެފައިވާކަމަށް ކަމަށް ބައެއް މީޑިއާތަކުން ރިޕޯޓްކޮށްފައިވެއެވެ.
އަދި އޭނާ އެގޭގައި އުޅޭތާ ކިހާ ދުވަހެއް ވެއްޖެތޯ ފުލުހުން ސުވާލުކުރުމުން 40 އަހަރުވެއްޖެ ކަމަށް ބުނެފައިވާ ކަމަށާއި ހޮސްޕިޓަލަށް ގެންދިޔައީ ކާކުތޯ ސުވާލު ކުރުމުން ގެންދިޔައީ ކާކުކަން ނޭނގޭ ކަމަށް އަންހެން މީހާ ބުނި ކަމަށްވެސް އޮންލައިން ނޫސް "ވަން އޮންލައިން" ގައި ރިޕޯޓްކޮށްފައިވާއިރު، އެމީހާ އެގޭގައި އުޅޭތާ އަދި ވީ ތިން އަހަރުކަމަށް އާއިލާއިން ވަނީ ބުނެފައެވެ.
މީގެއިތުރުން ހަމަ އެދުވަހު ބާރަށުން ނިޔާވި ފާތުމަތު މޫސާއާ ގުޅޭ ގޮތުން ބާރަށު ކައުންސިލުގެ ނައިބު ރައީސް އަލީ ޝަމީމު ވިދާޅުވީ، ފާތިމަތު ނިޔާވިކަން އެނގުނީ ފަތިސް ނަމާދަށް ނުތެދުވެގެން އޭނާގެ ފިރިމީހާ ގޮސް ގޮވުމުން ކަމަށެވެ.
