ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު ޑޮކްޓަރ އަފްރާޝީމް ޢަލީގެ މަރުގެ މައްސަލައިގައި މަރުތައް ތަޙްޤީޤު ކުރުމަށް އުފައްދާފައިވާ ރިޔާސީ ކޮމިޝަނުން ކުރަމުންދާ ތަޙްޤީޤުގެ 90 އިންސައްތަ ނިމިފައިވާކަމަށް ރައީސް އިބްރާހީމް މުޙައްމަދު ޞޯލިޙް ވިދާޅުވެއްޖެއެވެ.

ޑޮކްޓަރ އަފްރާޝީމް ޢަލީ އަވަހާރަކޮށްލާފައިވަނީ ކަތިވަޅިން ޙަމަލާދީ، ގޭގެ ސިޑިގޮޅީގެ ތެރޭގައި، 2012 ވަނަ އަހަރުގެ އޮކްޓޯބަރ މަހުގެ ތެރޭގައެވެ.

ރައީސް ޞޯލިޙް އިއްޔެ ނޫސްވެރިންނާ ބައްދަލުކުރައްވައި ވިދާޅުވީ، ރިޟްވާނުގެ މަރުގެ މައްސަލައިގެ އިތުރުން ކަންބޮޑުވުންތައް ހުރި އިތުރު އެހެން މަރުތަކުގެ މައްސަލަތައްވެސް ކޮމިޝަނުން ބައްލަވަމުން ގެންދަވާ ކަމަށާއި، އޭގެތެރޭގައި، ޑޮކްޓަރ އަފްރާޝީމުގެ މަރުގެ މައްސަލަވެސް ތަޙްޤީޤު ކުރެވެމުންދާ ކަމަށެވެ.

"އަޅުގަނޑަށް މަޢުލޫމާތު ލިބިފައި އޮތް ގޮތުން، ޑޮކްޓަރ އަފްރާޝީމުގެ މައްސަލައިގައިވެސް ގާތްގަނޑަކަށް 90 ޕަސެންޓް ވަނީ މިހާރު ނިމުމަކަށް އައިސްފައި." ރައީސް ޞޯލިޙް ވިދާޅުވިއެވެ.

ހަމަ އެއާއެކު މަރާލާފައިވާ މަޝްހޫރު ބްލޮގަރ ޔާމީން ރަޝީދުގެ މައްސަލަވެސް، ކޮމިޝަނުން ވަރަށް ރަނގަޅަށް ބައްލަވަމުން ގެންދަވާ ކަމަށް ރައީސް ވިދާޅުވިއެވެ.

ރައީސް ޞޯލިޙް އިއްޔެ ވިދާޅުވީ، ވެރިކަމާ ހަވާލުވެ 17 ނޮވެންބަރު 2018 ގައި އެކުލަވާލި، މަރާލާފައިވާ މީހުންނާއި، ގެއްލުވައިލާފައިވާ މީހުންގެ ތަޙުޤީޤު ކުރުމަށް ކޮމިޝަނުން މިހާތަނަށް ވަރަށް ރަނގަޅު ބުރަ މަސައްކަތް އަދި އުނދަގޫ މަސައްކަތްތަކެއް ކުރައްވާފައިވާ ކަމަށެވެ.

މިހިނގާ ސެޕްޓެމްބަރު މަހުގެ 1 ވަނަ ދުވަހު މަރުތައް ތަޙްޤީޤުކުރާ ކޮމިޝަނުން ވަނީ ރިޟްވާން މަރާލި މައްސަލައިގެ ގިނަ ތަފްސީލުތަކެއް ހާމަކުރައްވާފައެވެ.