ރިސޯޓެއްގައި ހިނގި އެކްސިޑެންޓެއްގައި ގާއަޅާ ބޮޑު މެޝިނެއްގެ ބެލްޓް ދަށުވެގެން މީހަކު ނިޔާވެއްޖެއެވެ.
ފުލުހުން ވިދާޅުވީ، 2019 އޮކްޓޯބަރު 2 ވަނަ ދުވަހު (އިއްޔެ) އިރުއޮއްސި 06:20 ހާއިރު ނ.އަތޮޅުގައި ރިސޯޓެއްގެ ގޮތުގައި ތަރައްޤީކުރަމުންދާ ނ.ދިގުރަށުގައި، ސަން ކޮންސްޓްރަކްޝަން ކުންފުނީގެ ދަށުން މަސައްކަތް ކުރަމުންދިޔަ 25 އަހަރުގެ ބިދޭސީ ފިރިހެނެއް ބޮޑެތި އަނިޔާތަކެއް ލިބިގެން ނ.މަނަދޫ ހޮސްޕިޓަލަށް ގެންގޮސްފައިވާކަމަށް ފުލުހުންނަށް ރިޕޯޓްކޮށްފައިވާ ކަމަށެވެ.
"މި މައްސަލައާއި ގުޅިގެން ފުލުހުން މިހާތަނަށް ބެލި ބެލުމުން، މި މީހާއަށް އަނިޔާވެފައިވަނީ އެ ރިސޯޓްގައި މަސައްކަތް ކުރަމުންދަނިކޮށް ގާ އަޅާ ބޮޑު މެޝިނެއްގެ ބެލްޓް ދަށުވެގެން ހިނގި އެކްސިޑެންޓެއްގައި ކަމަށް މަޢުލޫމާތު ލިބިފައިވޭ." ފުލުހުން ވިދާޅުވިއެވެ.
ބޮޑެތި އަނިޔާތަކަކާއެކު ހޮސްޕިޓަލަށް މި މީހާ ގެންދިޔައިރުވެސް ނިޔާވެފައިވާކަމަށް ހޮސްޕިޓަލުން މަޢުލޫމާތު ދެއްވައެވެ.
ގާއަޅާ މެޝިނެއްގެ ބެލްޓް ދަށުވެގެން ބިދޭސީ މަސައްކަތްތެރިއަކު ނިޔާވި މައްސަލަ މޯލްޑިވްސް ޕޮލިސް ސަރވިސް އިން އަންނަނީ ތަޙްޤީޤު ކުރަމުންނެވެ.
ހަދަމުންސިޔަ ރިސޯޓެއްގައި ގާއަޅާ މެޝިނެއްގެ ބެލްޓް ދަށުވެގެން ބިދޭސީއަކު ނިޔާވިއިރު، ހުސްވި ސެޕްޓެމްބަރު މަހުގެ 28 ވަނަ ދުވަހު ކޮޅުވެއްޓިއެއްގެ ރޭމްޕް ހިއްލުމަށް ޗެއިން ބްލޮކް ބޭނުން ކުރިއިރު އޭގެ އެއްފަޅި ފެއިލްވެގެން ހިނގި އެކްސިޑެންޓެއްގައިވެސް ބިދޭސީއަކު ވަނީ ނިޔާވެފައެވެ.
