ގިނަ އަދަދެއްގެ މަސްތުވާތަކެތި ހިފައިގެން ރާއްޖޭގެ އިޤްތިޞާދީ ކަނޑުގެ ސަރަހައްދުން ހިފަހައްޓާފައިވާ ބޭރުގެ ބޯޓު ކައިރިޔަށް ދިޔަ ރާއްޖޭގެ މަސް ދޯނީގެ މަސްޢޫލު ވެރިޔާ ފުލުހުން ހައްޔަރު ކޮށްފިއެވެ.
އެމްއެންޑީއެފް ކޯސްޓްގާޑާއި މޯލްޑިވްސް ޕޮލިސް ސާރވިސް ގުޅިގެން ފުލުހުން ކަނޑުމަތީގައި ހިންގި ޚާއްސަ އޮޕަރޭޝަނެއްގައި މި ދިޔަ ހޮނިހިރު ދުވަހުގެރޭ 150 ކިލޯގެ މަސްތުވާތަކެތި އަތުލައިގަތް މައްސަލާގައި، ބޭރުގެ ބޯޓާއި ރާއްޖޭގެ މަސްދޯންޏެއްވެސް ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
މި މައްސަލާގައި އެމްއެންޑީއެފް ކޯސްޓްގާޑުގެ ބެލުމުގެ ދަށަށް ގެނެވިފައިވަނީ “ހެދޭކުރި -7” ނަމަކަށް ކިޔާ ދޯންޏެއްކެވެ. ފުލުހުން ހައްޔަރުކޮށްފައިވަނީ މި ދޯނީގެ މަސްޢޫލުވެރިޔާއެވެ.
މަސްތުވާތަކެތި ހިފައިގެން ރާއްޖޭގެ ކަނޑުގެ ސަރަހައްދަށް ވަދެއުޅުނު ބޭރުގެ ދޯނި ހިފަހައްޓާފައިވަނީ ހއ. ތުރާކުނުގެ ހުޅަނގުއުތުރުން ގާތްގަނޑަކަށް 172 މޭލު (27.5 ނޯޓިކަލް މޭލު) ބޭރުންނެވެ. މި ބޯޓު ރާއްޖެއާ ކައިރި ސަރަހައްދެއްގައި މަސްތުވާތަކެތި ހިފައިގެން އުޅޭކަމުގެ މަޢުލޫމާތު އެމްއެންޑީއެފް ކޯސްޓްގާޑާ ހިއްސާކޮށްފައިވަނީ އިންޑިއަން ކޯސްޓްގާޑުން، 2019 އޮކްޓޯބަރ 01 ވަނަ ދުވަހުއެވެ. އެދުވަހުން ފެށިގެން މޯލްޑިވްސް ނޭޝަނަލް ޑިފެންސް ފޯސްގެ ކޯސްޓް ގާރޑްއާއި، މޯލްޑިވްސް ޕޮލިސް ސަރވިސްގެ ޑްރަގް އެންފޯސްމެންޓް ޑިޕާރޓްމަންޓް އަދި ޑްރަގް އިންޓެލިޖެންސް ގުޅިގެން ކަނޑުމަތީގެ ޚާއްސަ އޮޕަރޭޝަނެއް ވަނީ ކުރިޔަށް ގެންގޮސްފައެވެ.
މި މައްސަލާގައި ހިފަހައްޓާފައިވަނީ ކޮން ޤައުމެއްގެ ބޯޓެއްކަމެއް އަދި ސާފެއްނުވެއެވެ. ނަމަވެސް އެ ބޯޓްގައި އިރާނުގެ ދިދަ ނަގާފައިވާކަމުގެ މަޢުލޫމާތު ވަނީ ލިބިފައެވެ.
ފުލުހުން ވިދާޅުވިގޮތުގައި މިހާތަނަށް ލިބުނު މަޢުލޫމާތަށް ބަލާއިރު މި ބޯޓުން އައިޑެންޓިފިކޭޝަންނެއް 6 މީހުން ވަނީ ހިފަހައްޓާފައެވެ. އަދި މި އޮޕަރޭޝަންގައި ހިފެހެއްޓި ރާއްޖޭގެ މަސްދޯނިން 2 ދިވެހި ފިރިހެނުންނާއި ބަނގްލަދޭޝް 2 ފިރިހެނުންވެސް ވަނީ ސަލާމަތީ ބާރުތަކުގެ ބެލުމުގެ ދަށަށް ގެންގޮސްފައެވެ.
