ކޮވިޑް-19 އާއި ގުޅިގެން އިގުތިސާދީ ބޮޑު އަޑިގަނޑަކަށް ވެއްޓިފައިވާ ދުނިޔޭގެ އެންމެ ބޮޑު އިގުތިސާދު އޮންނަ އެމެރިކާގައި ވަޒީފާ ނެއްމީހުންގެ އަދަދު 30 މިލިއަނަށްވުރެ މައްޗަށް އަރައިފިއެވެ.
މިގޮތުން ފާއިތުވެދިޔަ ހަފްތާގައި އެކަނިވެސް ވަޒީފާ ނެއްމީހުންނަށް ސަރުކާރުގެ ފަރާތުންދޭ އެލަވެންސު ހޯދުމަށް 3.8 މިލިއަން މީހުންވަނީ އެދިފައެވެ. މިއާއެކު ކޮވިޑް-19 އާއި ގުޅިގެން އެމެރިކާ ލޮކްޑައުން ކުރިފަހުން ވަޒީފާ ނެއްމީހުންގެ އަދަދުވަނީ 30 މިލިއަނަށްވުރެ މައްޗަށް އަރައިފައެވެ.
ވާޒީފާދޭ ފަރާތްތަކުން ފައިސާ ރައްކާކުރުމުގެ ބޭނުމުގައި އެމީހުންގެ މުވައްޒަފުން ވަޒީފާތަކުން ވަކިކުރަމުންދާއިރު، އިގުތިސާދީ މާހިރުން ލަފާކުރާ ގޮތުގައި އޭޕްރީލްމަހު ވަޒީފާނެއް މީހުންގެ އިންސައްތަށް 20 އަރާނެއެވެ. މިއީ 1930 ގައި ކުރިމަތިވި "ގުރޭޓް ޑިޕްރެޝަން" އަށްފަހު ވަޒފާ ނެއްމީހުންގެ ނިސްބަތް މިހާ ބޮޑު އިންސައްތައަކުން އިތުރުވެގެންދާ ފަހަރެވެ.
"ގުރޭޓް ޑިޕްރެޝަން"ގައި އެމެރިކާގައި ވަޒީފާ ނެއްމީހުންގެ ނިސްބަތްހުރީ 25 އިންސައްތައިގައެވެ.
އެމެރިކާއިން ކޮވިޑް-19 އަށް މިހާތަނަށްވަނީ މިލިއަނަކަށްވުރެ ގިނަ މީހުން ޕޮޒިޓިވުވެފައެވެ. އަދި މިބަލީގައި ބައިލައްކައަށްވުރެ ގިނަމީހުން އެމެރިކާއިންވަނީ މަރުވެފައެވެ.
