އެމެރިކާއިން ރާއްޖެއަށް ޒިޔާރަތްކުރި ފަތުރުވެރިންގެ އަދަދު މިހާރު ވަނީ 50،000 އަށްވުރެ މަތިވެފައެވެ. މިއީ ރާއްޖޭގެ ފަތުރުވެރިކަމުގެ ސިނާއަތަށް ލިބުނު އިތުރު ކުރިއެރުމެކެވެ. މިހާރު އެމެރިކާއަކީ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ގައުމުތަކުގެ ތެރެއިން 7 ވަނައިގައި އޮތް ގައުމެވެ.
ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ ތަފާސްހިސާބުތައް ދައްކާގޮތުން، މިމަހުގެ 21 ވަނަ ދުވަހުގެ ނިޔަލަށް އެމެރިކާއިން ރާއްޖެއަށް 51,021 (ފަންސާސް އެއްހާސް އެކާވީސް) ފަތުރުވެރިން ވަނީ ޒިޔާރަތްކޮށްފައެވެ. މިއީ ރާއްޖެއަށް އައި ޖުމްލަ ފަތުރުވެރިންގެ %2.9 އެވެ. އުތުރު އެމެރިކާގެ ބާޒާރުން ރާއްޖެއަށް ލިބޭ ތަރުހީބު މި އަދަދުން ވަނީ ހާމަވެފައެވެ.
މި އަހަރުގެ މިމަހުގެ 21 ގެ ނިޔަލަށް ރާއްޖެއަށް ޖުމްލަ 1,763,319 (އެއްމިލިޔަން ހަތްސަތޭކަ ފަސްދޮޅަސް ތިން ހާސް ތިންސަތޭކަ ނަވާރަ) ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މިމުއްދަތާ އަޅާބަލާއިރު %10 ގެ އިތުރުވުމެކެވެ. ރާއްޖެއަށް އެންމެ ގިނަ ފަތުރުވެރިން މިމުއްދަތުގައި އައިސްފައިވަނީ ޗައިނާ (287,274)، ރަޝިއާ (216,621)، އިނގިރޭސިވިލާތް (155,136)، ޖަރުމަނުވިލާތް (129,477)، އަދި އިޓަލީވިލާތް (117,614) އިންނެވެ.
ފަތުރުވެރިން އެންމެ ގިނައިން ޗުއްޓީ ހޭދަކޮށްފައިވަނީ ރިސޯޓްތަކުގައި ކަމަށް ތަފާސްހިސާބުތަކުން ދައްކައެވެ. ރިސޯޓްތަކުގައި %73.7 ފަތުރުވެރިން ޗުއްޓީ ހޭދަކުރިއިރު، ގެސްޓްހައުސްތަކުގައި ޗުއްޓީ ހޭދަކުރީ %21.5 ފަތުރުވެރިންނެވެ.
ސަރުކާރުން މި އަހަރަށް އަމާޒު ހިފާފައިވަނީ 2.3 މިލިޔަން ފަތުރުވެރިން ގެނައުމަށެވެ. މިހާތަނަށް 1.7 މިލިޔަން ފަތުރުވެރިން ޒިޔާރަތްކޮށްފައިވާއިރު، އަމާޒަށް ވާސިލްވުމަށް ދެން ބޭނުންވަނީ 600,000 ފަތުރުވެރިންނެވެ. މިހާރު އެވްރެޖްކޮށް ދުވާލެއްގެ މައްޗަށް 6,000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކުރަމުންދާކަން ފާހަގަކުރެވެއެވެ.
