ޖިނާއީ އިޖުރާއަތުގެ ޤާނޫނަށް އިސްލާހު ގެނައުމަށްޓަކައި ރައްޔިތުންގެ މަޖިލީހަށް ބިލެއް ހުށައަޅައިފިއެވެ.

އެހެން ކަމުން ކޮވިޑް-19 އާ ގުޅިގެން މިހާރު މެދުވެރިވެފައިވާ ޙާލަތުގައި ޖިނާއީ އިޖުރާއަތުގެ ޤާނޫނުގައި ބަޔާންކުރާ ޢާންމު އިޖުރާއަތުތައް ހިންގުމަށް ދަތިވާތީ، ކަމާގުޅޭގޮތުން ޢަމަލުކުރާނެ ޚާއްޞަ އިޖުރާއަތުތަކެއް ބަޔާންކުރުމަށްޓަކައި، މި ޤާނޫނަށް އިޞްލާޙު ގެނައުމުގެ ބިލެއް، 5 މޭ 2020 ގައި ސަރުކާރުގެ ފަރާތުން ވަނީ ރައްޔިތުންގެ މަޖިލީހަށް ހުށަހަޅާފައެވެ.

ޖިނާއީ އިޖުރާއަތުގެ ޤާނޫނަށް އިޞްލާޙު ގެނައުމުގެ މި ބިލުގައި، ޤައުމަށް ދިމާވާ މިފަދަ ކުއްލި ނުރައްކަލުގެ ޙާލަތްތަކުގައި އަޅަންޖެހޭ ރައްކާތެރިކަމުގެ ފިޔަވަޅު އެޅުމަށްފަހުގައިވެސް، ޖިނާއީ ޝަރީޢަތްތައް މެދުނުކެނޑި ހިނގޭނެ އުސޫލުތަކެއް ޤާއިމުކޮށްދިނުމަށްޓަކައި، ޝަރީޢަތުގެ މަޖިލިސްތައް، ވީޑިއޯ ކޮންފަރެންސް މެދުވެރިކޮށް ކުރިއަށްގެންދެވޭނެ އުސޫލުތައް ކަނޑައަޅާފައިވެއެވެ.

އެގޮތުން، ހައްޔަރުކުރެވޭ މީހުން ފަނޑިޔާރެއްގެ ކުރިމައްޗަށް ޙާޟިރުކުރުމަށް ބާއްވާ ޝަރީޢަތުގެ މަޖިލިސްތަކާއި، ޝަރީޢަތުގެ ޢާންމު މަޖިލިސްތައް، ވީޑިއޯ ކޮންފަރެންސް މެދުވެރިކޮށް ކުރިއަށްގެންދެވޭނެ އުސޫލުތައް، މި ބިލުގައި ބަޔާންކޮށްފައިވާއިރު، ހައްޔަރުކުރުމަށްފަހު ޢަމަލުކުރާ ބައެއް އިޖުރާއަތުތަކާއި، ބަންދުގައި ބެހެއްޓުމުގައި ޢަމަލުކުރާ ބައެއް އިޖުރާއަތުތަކާއި، ޤާނޫނީ ވަކީލާ ބައްދަލުކުރުމުގެ ބައެއް އިޖުރާއަތުތައް، މިފަދަ ޚާއްޞަ ޙާލަތްތަކަށް ރިޢާޔަތްކޮށް، ތަޢާރުފުކުރުމަށްވެސް މި ބިލުގައި ހުށަހަޅާފައިވެއެވެ.

މީގެ އިތުރުން ޖިނާއީ އިޖުރާއަތުގެ ޤާނޫނުގެ އިތުރުން، ޖިނާއީ ކުށް ކަނޑައެޅުމުގެ ޚާއްޞަ ޤާނޫނުތަކުގައި ކަނޑައަޅާފައިވާ ދަޢުވާކުރުމުގެ މުއްދަތުތަކާއި، އިސްތިއުނާފުކުރުމުގެ މުއްދަތުތައް ގުނުމުގައި ޢަމަލުކުރާ ގޮތް ބަދަލުކުރުމަށް ހުށަހަޅާފައިވާ އިޞްލާޙުތައްވެސް މި ބިލުގައި ވަނީ ހިމަނާފައެވެ.