ކޮވިޑް-19 އާއި ގުޅޭ ކުރީގެ ދުވަސްތަކުގެ ތަފާސް ހިސާބުތައް ހާމަނުކުރަން ބުރެޒިލުގެ ސަރުކާރުން ނިންމައިފިއެވެ.
ބުރެޒިލުން މިގޮތަށް ނިންމައި އެ މައުލޫމާތުތައް ހިއްސާ ކުރަމުންދިޔަ ސަރުކާރު ވެބްސައިޓުންވަނީ މިއަދުގެ މައުލޫމާތުތައް ފިޔަވައި އެހެން ހުރިހާ ދުވަހެއްގެ ކޮވިޑް-19 އާއި ގުޅޭ މައުލޫމާތުތައް ނަގައިފައެވެ.
ބުރެޒިލްގެ ސިއްހަތާއިބެހޭ ވުޒާރާއިން ބުނެފައިވަނީ، ކުރިއަށް އޮތް ދުވަސްތަކުގައި ބުރެޒިލުން ދެން ހާމަކުރަމުންދާނީ ހަމައެކަނި 24 ގަޑިއިރުތެރޭ ކޮވިޑް-19 އާއި ގުޅޭ މައުލޫމާތުތައް އެކަނި ކަމަށެވެ. އެހެން ގައުމުތަކާއި ހިލާފަށް މުޅި ޖުމްލަ އަދަދުތައް ދެން ހާމަނުކުރާނެ ކަމަށެވެ.
ބުރެޒިލުން މިގޮތަށް އަމަލުކުރަން ފަށައިފައި މިވަނީ ކޮވިޑް-19 ބުރެޒިލްގައި ފެތުރުން ކޮންޓުރޯލް ކުރުމަށް ބުރެޒިލްގެ ސަރުކާރުން އެކަށީގެންވާ ވަރަށް އަމަލުކުރަމުން ނުދާކަމަށް ބުނެ ގިނަ ބަޔަކު އެކަމުގެ ފާޑުކިޔުން ބުރެޒިލްގެ ސަރުކާރަށް އަދި ހާއްސަކޮށް ބުރެޒިލްގެ ރައީސަށް އަމާޒު ކުރަމުންދާ ދަނޑިވަޅެއްގައެވެ.
ބުރެޒިލް މިވަގުތު އޮތީ ކޮވިޑް-19 އަށް އެންމެ ގިނަ އަދަދަކަށް މީހުން ޕޮޒިޓިވްވީ ގައުމުތަކުގެ ލިސްޓުގެ ދެވަނައިގައެވެ. އަދި މިފަހުން ބުރެޒިލް ފާހަގަ ކުރެވިގެންދަނީ މިބަލީގައި އެންމެ ގިނަ އަދަދަކަށް ދުވާލެއްގެ ތެރޭ މީހުން މަރުވާ ގައުމުގެ ގޮތުގައެވެ.
މިހާތަނަށް ބުރެޒިލުން 676،494 މީހުންވަނީ ކޮވިޑް-19 އަށް ޕޮޒިޓިވްވެފައެވެ. އަދި މިބަލީގައި މިހާތަނަށް ބުރެޒިލުން 36،044 މަރުވެފައިވާއިރު މިއަދަދުތައް މިއަށްވުރެ މަތިވުންވެސް އެކަށީގެންވާ ކަމަށް ދިރާސާކުރާ ފަރާތްތަކުން އަންނަނީ ބުނަމުންނެވެ.
