ކޮވިޑް-19ގެ ހާލަތު އެންމެ ގޯސް ގައުމުތަކުގެ ލިސްޓުގެ ދެވަނައަށް ބުރެޒިލް އަރައިފިއެވެ.
މިގޮތުން ކޮވިޑް-19 އަށް މިހާތަނަށް ދެވަނައަށް އެންމެ ގިނަ އަދަދަކަށް މީހުން ޕޮޒިޓިވްވެފައިވަނީ ބުރެޒިލުންނެވެ. އަދި މިބަލީގައި ދެވަނައަށް އެންމެ ގިނަ މީހުން މަރުވެފައިވަނީވެސް ބުރެޒިލުންނެވެ.
ކޮވިޑް-19 އަށް ބުރެޒިލުން މިހާތަނަށް 831،064 މީހުންވަނީ ޕޮޒިޓިވްވެފައެވެ. އަދި މިބަލީގައި ބުރެޒިލުންވަނީ 41،952 މީހުން މަރުވެފައެވެ. އިއްޔެއާއި ހަމައަށް އެންމެ ގިނަ މީހުން ކޮވިޑް-19 ޖެހިގެން މަރުވި ގައުމުތަކުގެ ލިސްޓުގެ ދެވަނައިގައި އޮތީ އިނގިރޭސި ވިލާތެވެ. އެއީ މިބަލީގައި 41،662 މީހުން މަރުވެގެންނެވެ.
ބުރެޒިލްގެ ހާލަތު ދުވަހެއް ދުވަހަކަށް ގޯސްވަމުން ދިޔަނަމަވެސް ދުނިޔޭގެ ސިއްހަތު ޖަމުއިއްޔާއިން ވިދާޅުވެފައިވަނީ އެގައުމުގެ ސިއްހީ ހާލަތު އެގައުމަށް ކޮންޓުރޯލް ނުވާ ދަރަޖައަށް އަދި ނުދާ ކަމަށެވެ. ނަމަވެސް، އާބާދީ ބޮޑެތި ސިޓީތަކުގައި ކޮވިޑް-19 ހަލުވިކަމާއެކު ފެތުރެމުންދާ ކަމަށެވެ.
ބުރެޒިލްގެ ހެލްތް މިނިސްޓްރީން އިއްޔެ ވިދާޅުވެފައިވަނީ، 24 ގަޑިއިރުގެ ތެރޭގައި އެގައުމުން ކޮވިޑް-19 އަށް 25،982 މީހުން ޕޮޒިޓިވްވެފައިވާ ކަމަށެވެ. އަދި މިބަލީގައި އެގަޑިއިރުގެ ތެރޭގައި909 މީހުން މަރުވެފައިވާ ކަމަށެވެ. މިއާއެކު މިދިޔަ ހަފްތާގެ އަންގާރަ ދުވަހުން ފެށިގެން އިއްޔެއާއި ހަމައަށް ބުރެޒިލުންވަނީ މިބަލީގައި 1200 އަށްވުރެ ގިނަ މީހުން މަރުވެފައެވެ.
މިދިޔަ އަހަރުގެ ޑިސެމްބަރުމަހުގެ ފަހުކޮޅު ޗައިނާއިން ފެނުނު ކޮވިޑް-19ގެ ނުރައްކާތެރިކަން ވިސްނި މިއަހަރުގެ ކުރީކޮޅު ގައުމުތަކުންވަނީ މިބަލިން ރައްކާތެރިވުމުގެ ގޮތުން ހަރުކަށި ފިޔަވަޅުތައް އަޅަން ފަށައިފައެވެ. ނަމަވެސް މިފިޔަވަޅުތަކާއި ގުޅިގެން ގައުމުތަކަށް ދިމާވަމުންދާ އިގުތިސާދީ ހީނަރުކަމާއި ގުޅިގެން މި ފިޔަވަޅުތަކަށް ގައުމުތަކުން އަންނަނީ ލުއިތައް ދެމުންނެވެ.
