ކޮވިޑް-19 ޖެހިގެން ރާއްޖެއިން އިތުރު މީހަކު ނިޔާވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވިދާޅުވީ، ކޮވިޑް-19 ޖެހިގެން އުމުރުން 79 އަހަރުގެ ދިވެހި އަންހެނަކު މިއަދު ނިޔާވެފައިވާކަމަށެވެ. ހުޅުމާލެ މެޑިކަލް ފެސިލިޓީގައި އެޑްމިޓްކުރި މިމީހާ ނިޔާވެފައިވަނީ މިއަދު ހަވީރު 05:05 ގައިކަމަށްވެސް އެޗްޕީއޭއިން ވިދާޅުވިއެވެ.
މިއީ ކޮވިޑް-19 ޖެހިގެން ރާއްޖެއިން ނިޔާވި 14 ވަނަ މީހާއެވެ. އޭގެ ތެރޭގައި ހިމެނެނީ 8 ދިވެހިންނާއި 6 ބިދޭސީންނެވެ. ބިދޭސީންގެ ތެރޭގައި ހިމެނެނީ ބަންގްލަދޭޝްގެ ފަސް މީހުންނާއި ފިލިޕީންސް މީހެކެވެ.
Today evening at 05:05pm, a 79-year-old Maldivian female admitted at HMF has passed away.
This is the 14th #COVID19 death in the Maldives.
Our thoughts and prayers are with the bereaved family. May Allah grant her soul eternal peace in heaven.
— Health Protection Agency (@HPA_MV) July 14, 2020
"މިހާރު" ގައި ބުނެފައިވަނީ މިއަދު ނިޔާވި މީހާ ކޮވިޑް-19 އަށް ޕޮޒިޓިވްވީ އައިޖީއެމްއެޗް ކްލަސްޓާ އިން މިމަހުގެ 4 ވަނަ ދުވަހު އެވެ.
މީގެކުރިންވެސް އައިޖީއެމްއެޗްގެ ކްލަސްޓާ އިން ޕޮޒިޓިވްވި އިތުރު މީހަކު ނިޔާވެފައިވާއިރު، އުމުރުން 80 އަހަރުގެ އެ މީހާ ނިޔާވެފައިވަނީ މި މަހުގެ 6 ވަނަ ދުވަހުއެވެ.
ކޮވިޑް-19ގެ އެހެނިހެން ތަފާސްހިސާބުތަކަށް ބަލައިލާއިރު ރާއްޖެއިން މިހާތަނަށް މިބައްޔަށް 2762 މީހުން ޕޮޒިޓިވްވެފައިވެއެވެ. އަދި 2،290 މީހަކު މިބަލިން ރަނގަޅުވެފައިވާއިރު، މިހާރު މިބައްޔަށް ފަރުވާދެމުންދަނީ 382 މީހުންނަށެވެ.
ކޮވިޑް-19ގެ ފުރަތަމަ ކޭސް ރާއްޖެއިން ފެނުނުތާ މިއަދަށްވަނީ 129 ދުވަސް ވެފައެވެ.
