ދިވެހިރާއްޖެ އަށް ކުރިއަށް އޮތީ ދަތި 6 މަސް ދުވަސް ކަމަށް އިކޮނަމިކް މިނިސްޓަރ ފައްޔާޒު އިސްމާއިލް ވިދާޅުވެއްޖެ އެވެ.
ރޭ ޓީވީއެމް އިން ގެނަސްދިން "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުން ފައްޔާޒު ވިދާޅުވީ ދިވެހިރާއްޖެ ކުރިއަށް އޮތް 6 މަސް ދުވަސް ހޭދަކުރަންޖެހޭނީ ވަރަށް ދަތިކޮށް ކަމަށެވެ.
ފައްޔާޒު ވިދާޅުވީ 2019 ގައި ތިބި ހިސާބަށް އަނބުރާ ދެވޭނެ ކަމަށް ގަބޫލުކުރެވެނީ ގާތްގަޑަކަށް 2022 ގެ ނިޔަލަށް ކަމަށެވެ. އަދި މިއީ ކުރިމަތިވެފައިވާ ވަރަށް ބޮޑު ގޮންޖެހުމެއް ކަމަށްވެސް މިނިސްޓަރު ފައްޔާޒު ވިދާޅުވިއެވެ.
ފައްޔާޒު ވިދާޅުވީ މިއީ ދެވަނަ ބޮޑު ހަނގުރާމައަށްފަހު މުޅި ދުނިޔެއަށް ވެސް އިގްތިސާދީ ގޮތުން ދިމާވި އެންމެ ބޮޑު ގޮންޖެހުން ކަމަށެވެ. ކޮވިޑް-19 އަށް ވެކްސިނެއް ލިބެންދެން ކޮވިޑާއި ގުޅިގެން ދިމާވާ ދަތިތައް ދެމި އޮންނާނެ ކަމަށްވެސް މިނިސްޓަރ ފައްޔާޒު ވިދާޅުވިއެވެ.
މިނިސްޓަރ ފައްޔާޒު އިތުރަށް ވިދާޅުވީ ރާއްޖޭގެ އިގްތިސާދު މައިގަނޑު ގޮތެއްގައި ބަރޯސާވެފައިވާ ޓޫރިޒަމް އިންޑަސްޓްރީ އެއްކޮށް ހުއްޓިފައި އޮތުމުން ރާއްޖޭގެ އިގްތިސާދު ވަރަށް އުނދަގޫ، ދަތި ހާލަތަކަށް ވެއްޓިފައިވާ ކަމަށެވެ.
ރާއްޖޭގެ ބޯޑަރު ބަންދު ކުރިއިރު 380،000 އަށް ވުރެ ގިނަ ފަތުރުވެރިން ރާއްޖެ އަށް ޒިޔާރަތްކޮށްފައި ވެއެވެ. ނަމަވެސް ބޯޑަރު ހުޅިވިފަހުން މި އޮގަސްޓު މަހުގެ 3 ވަނަ ދުވަހާއި ހަމަޔަށް ރާއްޖެ އަށް ޒިޔާރަތް ކޮށްފައިވަނީ 1769 ފަތުރުވެރިން ނެވެ.
