ރ. ދުވާފަރުގައި ހޯމް ކަރަންޓީނުގައި ހުރި އިތުރު 2 މީހަކު ކޮވިޑް-19 އަށް ޕޮޒިޓިވް ވެއްޖެ އެވެ.
ދުވާފަރު ކައުންސިލްގެ ރައީސް އިބްރާހިމް ނަޞީރު "ފެށުން" އަށް ވިދާޅުވީ ދުވާފަރު ހޯމް ކަރަންޓީނުގައި ހުރި 2 މީހަކު އިއްޔެ ކޮވިޑަށް ޕޮޒިޓިވް ވެފައިވާކަމަށެވެ.
މިއާއިއެކު ދުވާފަރުން ކޮވިޑަށް ޕޮޒިޓިވްވެފައިވާ މީހުން ތިބި އަދަދު މި ވަނީ 5 އަށް އަރައިފައެވެ. ނަމަވެސް ދުވާފަރުން މި ހަފްތާގެ ތެރޭގައި ޕޮޒިޓިވްވި ހައި ރިސްކް މީހަކު ވަނީ ބ. އޭދަފުށި ކޮވިޑް ފެސިލިޓީއަށް ބަދަލުކޮށްފައެވެ. އެހެން ކަމުން މިވަގުތު އެރަށުގައި ކޮވިޑަށް ޕޮޒިޓިވް ވެފައިވާ 4 މީހުން އެބަތިއްބެވެ.
ދުވާފަރު ކައުންސިލްގެ ރައީސް "ފެށުން" އަށް ވިދާޅުވީ މިހާރުވެސް ގާތްގަނޑަކަށް 90 ވަރަކަށް މީހުން ހޯމް ކަރަންޓީނުގައި އެބަތިބި ކަމަށާއި ކޮވިޑަށް ޕޮޒިޓިވް ވެފައިވާ ރަށުގައި މިވަގުތު ތިބި ހަތަރު މީހުންގެ ހާލުވެސް ރަނގަޅު ކަމަށެވެ.
ދުވާފަރަކީ ރ އަތޮޅުގެ ރަށްތަކުގެ ތެރެއިން ކޮވިޑް-19 ގެ އެންމެ ގިނަ ކޭސްތައް މިހާތަނަށް ފެނިފައިވާ ރަށެވެ.
އެރަށުން ވަނީ ހޯމް ކަރަންޓީނުގައި ހުރި 3 އަހަރުގެ ފިރެހެން ކުއްޖަކުވެސް ކޮވިޑަށް ޕޮޒިޓިވްވެފަ އެވެ. އަދި އެރަށުން 55 އަހަރުގެ އަންހެނަކުވެސް ވަނީ ކޮވިޑް-19 އަށް ޕޮޒިޓިވް ވެފައެވެ.
މިހާތަނަށް މުޅި ޖުމްލަ 108.099 ސާމްޕަލް ނަގައި ކޮވިޑް-19 އަށް ޓެސްޓު ކޮށްފައިވާއިރު މިބައްޔަށް ޕޮޒިޓިވުވި މީހުންގެ ޖުމްލަ އަދަދަކީ 7،329 އެވެ. މީގެތެރެއިން 4،691 މީހުން ރަނގަޅުވެފައިވާއިރު 28 މީހަކުވަނީ ނިޔާވެފައެވެ. އަދި މިވަގުތު އެކްޓިވް ކޭސަސްގެ ގޮތުގައި މިބައްޔަށް ފަރުވާ ހޯދަމުންދާ މީހުންގެ އަދަދަކީ 2،610 އެވެ.
