ކ. މާފުށީ މާބަނޑު އަންހެނަކު ވިހެއުމަށް ފ. އަތޮޅު ނިލަންދޫ ހޮސްޕިޓަލަށް ގެންދިއުމުން އެ ރަށަށް ނޭރުވި މައްސަލައެއް ފެންމަތިވެއްޖެއެވެ.

މާފުށި ކައުންސިލްގެ ރައީސް އުޘްމާން ރަޝީދު މި ނޫހަށް މައުލޫމާތު ދެމުން ވިދާޅުވީ، މާފުށިން ވެހެއުމަށް ފ. ނިލަންދޫއަށް މީހަކު ގެންދިއުމަށް ހުރިހާ އިންތިޒާމެއް ހަމަޖައްސާފައިވާކަމަށާއި، އެ ގޮތުން ހޮސްޕިޓަލަށާއި، ނިލަންދޫ ކައުންސިލަށްވެސް އެކަން އަންގާ މާ ބަނޑު މީހާ އެރަށަށް އެރުވުމުގެ ހުރިހާ ކަމެއް ވާނީ ހަމަޖައްސާފައިކަމަށެވެ.

ނަމަވެސް މިއަދު ހެނދުނު 10:00 ގައި މާފުށިން ފުރާ ގާތްގަނޑަކަށް ތިން ގަޑިއިރުގެ ދަތުރަކަށްފަހު ފ.ނިލަންދޫއަށް ދިއުމަށް މާބަނޑުމީހާ އާއި އަދި އޭނައާއެކު ދަތުރުކުރި މީހުން ރަށަށް އެރުވުމަށް ދެކޮޅު ހަދާފައިވާކަމަށް އުޘްމާން މައުލޫމާތުދިނެވެ.

"ސީދާ އަޅުގަނޑު ނިލަންދޫ ކައުންސިލްއަށް ރޭ ގުޅައި ވާހަކަ ދައްކާ އޭނައަށް ވިހެއުމަށް އެ ރަށަށް އެރޭނެ ކަމަށް ބުނެފައިވޭ" އުޘްމާން ވިދާޅުވިއެވެ.

އުޘްމާން ވިދާޅުވީ، އެރަށުން މާބަނޑު މީހާ ނިލަންދޫ ހޮސްޕިޓަލަށް ފޮނުވީ އެ ރަށު ކައުންސިލުންވެސް ހުރިހާ ކަމެއް އޯކޭ ވެގެން ކަމަށެވެ. ނަމަވެސް މިއަދު އޭނަ އެރަށަށް ދިއުމުން އެ ރަށަށް ނާރުވާ ދޮޅު ގަޑިއެއްހާއިރު ލޯންޗްގައި ހުންނަން ޖެހުނުކަމަށެވެ.

ނިލަންދޫ ހޮސްޕިޓަލުން އެމްބިއުލަންސްވެސް ބަނދަރަށް ގެނެސްފައިވާކަމަށާއި، ނަމަވެސް އެރަށު ކައުންސިލްގެ ރައީސް އިސްވެ ހުރެ ބަޔަކު ލައްވާ އެ މާބަނޑު މީހާ އެރަށަށް އެރުވުމަށް ހުރަސްއެޅީކަމަށް އުޘްމާން ވިދާޅުވިއެވެ.

7 ފަހަރުގެ މަތިން ނިލަންދޫ ކައުންސިލްގެ ރައީސްއަށް ގުޅުމުންވެސް ފޯނަށް ޖަވާބެއް ނުދިންކަމަށް އުޘްމާން ވިދާޅުވިއެވެ. އަދި ދޮޅު ގަޑިއިރެއްހާއިރު އެ ރަށު ބަނދަރުގައި އޮތުމަށްފަހު ރަށަށް ނޭރުމުން އެނބުރި މާފުއްޓަށް ދިއުމަށް ލޯންޗު ނައްޓާލީ މެންދުރު 01:30 ގައި ކަމަށް މައުލޫމާތުދިނެވެ.

ކޮވިޑް-19 ގެ ލޮކްޑައުންގެ ހާލަތުގައި މުޅި ރާއްޖެ އޮތުމަށްފަހު ގެސްޓު ހައުސްތައް ހުޅުވާލުމަށް ސަރުކާރުން ހުއްދަދީފައިވަނީ މިދިޔަ އޮކްޓޯބަރު މަހުގެ15 ގައެވެ. އެގޮތުން ގެސްޓު ހައުސްތައް އޮކްޓޯބަރު 15 ގައި ހުޅުވާލި ފަހުން އެ ރަށުން ވަނީ ތިން ފަތުރުވެރިއަކު ކޮވިޑް-19އަށް ޕޮޒިޓިވްވެފައެވެ.

ގެސްޓު ހައުސްތައް ހުޅުވާލުމުގެ ހުއްދަ ދިނުމުގެ ކުރިން، ގެސްޓުހައުސް ހުންނަ ރަށަކުން އެހެން ރަށަކަށް މީހުން ދަތުރުކުރާނަމަ ކަރަންޓީނުވުމުގެ އުސޫލު އެޗްޕީއޭއިން ވަނީ ކަނޑައަޅާފައެވެ. ނަމަވެސް ގެސްޓް ހައުސް ހުންނަ ރަށަކުން އެހެން ރަށަކަށް ދަތުރުކުރާނަމަ ކަރަންޓީނު ވާން ނުޖެހޭނެ އުސޫލުތައްވެސް ކަނޑައަޅާފައިވާއިރު، އޭގެ ތެރޭގައި އެމެޖެންސީ ހާލަތްތަކުގައި ބޭސް ފަރުވާއަށް ދިއުން ހިމެނެއެވެ.

އެގޮތުން މާފުށިން އަންހެނަކު ވިހެއުމަށް ނިލަންދޫ ހޮސްޕިޓަލަށް ދިއުމުން އެ ރަށަށް ނޭރުވި މައްސަލައަކީ، އެޗްޕީއޭއިން ކައުންސިލަށް ނުދޭ ބާރެއް ބޭނުންކޮށްގެން ހިންގި އަމަލެއްކަމަށް މާފުށީ ކައުންސިލުގެ ރައީސް އުޘްމާން ވިދާޅުވިއެވެ.

މި މައްސަލަ ދިމާވެ، ކަމާބެހޭ ފަރާތްތަކަށް އެނގުމުން ސަރުކާރުގެ ތެރެއިން ވާހަކަ ދައްކައިގެން މި މައްސަލަ ހައްލުކޮށް މިހާރު ނިލަންދޫއަށް އެރޭނެ ގޮތް ހެލްތް މިނިސްޓްރީން ހަމަޖައްސައިފައިވާކަމަށް އުޘްމާން މައުލޫމާތުދިނެެވެ. ނަމަވެސް މާބަނޑު މީހާ ދެން އިތުރަށް ނިލަންދޫ ހޮސްޕިޓަލަށް ފަރުވާއަށް ދިއުމަށް ދާން ބޭނުންނުވާކަމަށާއި، އަދި މިހާރު މާލެއަށް ދިއުމަށް ތައްޔާރުވަމުން އަންނަ ކަމަށް މައުލޫމާތު ލިބިފައިވާކަމަށް އުޘްމާން ވިދާޅުވިއެވެ.