ހއ. ހޯރަފުއްޓަށް މޯލްޑިވިއަންގެ ޝެޑިއުލްގެ ދަތުރުތައް އަންނަ ބުރާސްފަތި ދުވަހު ފަށަން ނިންމައިފިއެވެ.
"މި ރަށުގެ އެއާޕޯޓު ހުޅުވުމާއެކު ޝެޑިއުލް ދަތުރުތައް ފެށުމަށް މިއަންނަނީ ތައްޔާރުވަމުން. އެގޮތުން މިމަހުގެ 26 ވަނަ ދުވަހުން ފެށިގެން ދަތުރުތައް ކުރާނެ،" މޫސަ ވިދާޅުވި އެވެ.
އޭނާ ވިދާޅުވީ ހޯރަފުއްޓަށް ކުރާ ދަތުރުތަކުގައި ޓިކެޓް ވިއްކާނީ ހދ. ކުޅުދުއްފުއްޓާއި ހދ. ހަނިމާދުއަށް ކުރާ ދަތުރުތަކުގައި ނަގާ ރޭންޖްގައި ކަމަށެވެ.
ތިލަދުންމަތީ އުތުރުބުރީ ހޯރަފުށީ ފަޅުން ބައެއް ހިއްކައިގެން، ކުރު މުއްދަތެއްގައި މި ސަރުކާރުން ތަރައްޤީކުރި ހޯރަފުށީ ޑޮމެސްޓިކް އެއާޕޯޓް، ރައީސުލްޖުމްހޫރިއްޔާ އިބްރާހީމް މުޙައްމަދު ޞޯލިހް އިއްޔެ ވަނީ ރަސްމީކޮށް ހުޅުވައިދެއްވައިފައެވެ.
ހޯރަފުށީ އެއާޕޯޓް ތަރައްޤީ ކޮއްފައިވަނީ 1200 މީޓަރު ދިގު، 30 މީޓަރު ފުޅާ ރަންވޭއަކާއި، ޓެކްސީ ވޭގެ އިތުރުން ޓާމިނަލާއި، ފަޔަރ ބިލްޑިންއާއެކުގައެވެ.
ބޮޑުތިލަދުންމަތީގެ ތިންވަނަ އެއާޕޯޓް ހުޅުވުމުގެ މި ކުލަގަދަ ރަަސްމިއްޔާތުގައި ރައީސްޖުލްޖުމްހޫރިއްޔާގެ އިތުރުން ސަރުކާރުގެ ވަޒީރުންނާއި، މަޖިލިސް މެންބަރުންގެ އިތުރުން، ސަރުކާރު ކުންފުނިތަކުގެ ވެރިންވެސް ބައިވެރިވެވަޑައިގެންނެވިއެވެ.
