ކުރިއަށް އޮތް ދެ ހަފްތާގައި ރާއްޖެއިން ޗައިނާއަށް 15 މިލިއަން ޑޮލަރު ދައްކަން ނުޖެހޭކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖަންގް ލީޖޮންގް ވިދާޅުވެއްޖެއެވެ.
ސަފީރު މިހެން ވިދާޅުވެފައިވަނީ ކުރިއަށް އޮތް ދެ ހަފްތާގައި ރާއްޖެއިން ޗައިނާއަށް 15 މިލިއަން ޑޮލަރު ދައްކަންޖެހޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވުމާއިގުޅިގެން އެކަން ދޮގު ކުރައްވާ ކުރެއްވި ޓްވީޓެއްގައިއެވެ.
މިކަން ދޮގު ކުރައްވާ ސަފީރު ޖަންގް ލީޖޮންގް ކުރެއްވި ޓްވީޓްގައި ވިދާޅުވީ ރާއްޖެއިން، 14 ދުވަސް ތެރޭގައި ޗައިނާގެ ބޭންކްތަަކަށް ދައްކަން ޖެހޭ 15 މިލިއަން ޑޮލަރު ޕޭމެންޓެެއް ބޭންކްތަކުން ދިން މައުލޫމާތަށް ބަލާއިރު ނެތް ކަމަށެވެ. އަދި އެކައުންޓް ފޮތް ބައްލަވައި އެ ފައިސާތައް ބަޖެޓުގެ ބޭނުންތަަކަށް ރައްކާކުރުމަށް އޭނާ އެދިވަޑައިގަތެވެ.
Good news. According to the feedback from banks,there is no such 15 million payment due in 14 days. Check the account book and save it for the budget. Cheers. https://t.co/SOygyvbN6r
— Amb. Zhang Lizhong (@AmbassadorZhang) December 11, 2020
ރައީސް ނަޝީދު މިއަދު ކުރެއްވި ޓްވީޓެއްގައި ވިދާޅުވީ، ކުރިއަށް އޮތް 14 ދުވަހުގެ ތެރޭގައި ދިވެހި ދައުލަތުން ޗައިނާގެ ބޭންކުތަކަށް 15 މިލިއަން ޑޮލަރު ދައްކަން ޖެހޭ ކަމަށެވެ. އެ ބޭންކުތަކުން އަދި މިހާތަނަށް ލޯނުތަކަށް އެއްވެސް ލުޔެއް ދީފައި ނުވާކަމަށްވެސް އެމަނިކުފާނު ވިދާޅުވި އެވެ.
މިއީ ކުރިއަށް އޮތް 14 ދުވަހު ރާއްޖެއަށް ލިބޭނެ ކަމަށް ބެލެވޭ އަމްދާނީގެ 50 އިންސައްތައަށް ވުރެ ބޮޑު އަދަދެއް ކަމަށާއި ކޮވިޑް-19 ގެ ބަލިމަޑުކަމުން ރަނގަޅުވަމުން މިދާ ދަނޑިވަޅުގައި ދިވެހި އިގްތިސާދަށް ނޭވާ ލާނެ ޖާގަ ވެސް ބޭނުންވާ ކަމަށް ނަޝީދުގެ ޓްވީޓްގައި ވިދާޅުވެފައިވެއެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި ރާއްޖޭގެ ތަރައްގީއަށް ހިންގި ގިނަ މަޝްރޫއުތައް ޗައިނާގެ އެހީއާއި ލޯނުތައް މެދުވެރިކޮށް ހިންގާފައިވާއިރު ރާއްޖެއިން ގާތްގަނޑަކަށް 1.1 ބިލިއަން ޑޮލަރު ޗައިނާއަށް ދައްކަން ޖެހެއެވެ. ޔާމީން ގެ ވެރިކަމުގައި ޗައިނާއިން ނެގި ލޯނުތައް މި ސަރުކާރުގައި ދައްކަން ޖެހޭތީ ރާއްޖެ ދަރަނިވެރިވެ، ބަޖެޓަށް ބުރަވެފައިވާކަމަށް މީގެ ކުރިންވެސް ރައީސް ނަޝީދު ވަނީ ވިދާޅުވެފައެވެ.
ލޯނުތައް އަނބުރާ ދެއްކުމަށް ބަޖެޓުގައި ހިމަނާފައިވާ 4.9 ބިލިއަން ރުފިޔާގެ ތެރެއިން 80 އިންސައްތައަށް ވުރެ ގިނަ ފައިސާއަކީ ޗައިނާއަށް ދޭން ޖެހޭ ފައިސާކަމަށް ނަޝީދު ވަނީ ކުރިން ވިދާޅުވެފައެވެ.
ޔާމިންގެ ސަރުކާރުގައި ޗައިނާއިން ނެގި ލޯނުތަކުން ގައުމު ދަރަނިވެރިވާ ކަމަށް ނަޝީދު ވިދާޅުވާ އިރު، މިހާރުގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އިންޑިއާއިން ބޮޑެތި ލޯނުތައް ނަގާފައިވުމުން އެކަމުން ގައުމު ދަރަނިވެރިވެފައިވާ ކަމަށް އިދިކޮޅުން ދަނީ ބުނަމުންނެވެ.
