ނަސޯރާއިން އީސާ އަލައިހިއްސަލާމް ދުނިޔެއަށް އުފަންވި ދުވަސްކަމަށްބުނެ ފާހަގަ ކުރާ ކުރިސްމަސް ދުވަހުގެ ތަހުނިޔާ ރައްޔިތުންގެ މަޖިލީހުގެ ރައީސް، ރައީސް ނަޝީދު ފޮނުވައިފިއެވެ.

ރައީސް ނަޝީދު މިއަދު ކުރެއްވި ޓުވީޓެއްގައި ވިދާޅުވީ، ކުރިސްމަސް ދުވަސް ފާހަގަކުރާ އެންމެހާ ފަރާތްތަކަށް ދުވަހުގެ ތަހުނިޔާ ފޮނުވާ ކަމަށެވެ.

ކުރިސްމަސް ދުވަހުގެ ތަހުނިޔާ ރައީސް ނަޝީދު ފޮނުއްވައިފައި މިވަނީ އެދުވަހުގެ ތަހުނިޔާ އެކަކު އަނެއްކަކަށް ފޮނުވުމަކީ އިސްލާމްދީނާއި ބީރައްޓެހި އަދި ކުރުން ހުއްދަވެގެންވާނެ ކަމެއް ނޫންކަމަށްބުނެ ރާއްޖޭގެ ގިނަ އަދަދެއްގެ އިލްމުވެރިން ވާހަކަފުޅު ދައްކަވައިފައި ވަނިކޮށެވެ.

I wish a wonderful Christmas to all those celebrating the day.

— Mohamed Nasheed (@MohamedNasheed) December 25, 2020

ދީނީ އިލްމުވެރިޔާ ޑރ. މުހައްމަދު އިޔާޒު އަބްދުﷲ މިމައުޟޫގައި ވިދާޅުވީ، ކުރިސްމަސް ދުވަހުގެ އަސްލަކީ ކުރިސްޓިއަނުން ގަބޫލުކުރާ ގޮތުގައި އެދުވަހަކީ ﷲ ގެ ދަރިކަލުން އީސާ އަލައިހިއްސަލާމް އުފަންވެ ވަޑައިގެއްނެވި ދުވަސް ކަމަށެވެ. ނަމަވެސް، އެގޮތަށް ގަބޫލު ކުރުމަކީ މީހާ ކުފުރުގެ ދަރަޖައަށް ގެންދާ ކަމެއް ކަމަށެވެ. ވީމާ މުސްލިމަކު ކުރިސްޓިއަނަކަށް އެގޮތަށް ވިޝް ކުރާނަމަ އޭގެ މާނައަކަށް، ތިމައްނާވެސް ތިބާގެ އަގީދާ ގަބޫލު ކުރަމޭ ބުނުން ކަމަށް ވެދާނެ ކަމަށެވެ. ވީމާ ރަހުމަތްތެރިކަން ދެމެހެއްޓުމަށްވެސް މިފަދަ ކަންކަން ނުކުރުމަށް ޑރ. އިޔާޒު ނަސޭހަތްތެރި ވެފައި ވެއެވެ.