ހަލުވިކަމާ އެކު ދުނިޔޭގެ އެކި ކަންކޮޅުތަކުގައި ފެތުރެމުންދާ ކޮވިޑް-19 އިން ދިފާއުވާން ޗައިނާގެ ސިނޮވެކް ބަޔޯޓެކް ކުންފުނިން އުފެއްދި ވެކްސިން އިންޑޮނޭޝިއާގައި އެމަރޖެންސީ ހާލަތްތަކުގައި ބޭނުން ކުރުމުގެ ހުއްދަ ދީފިއެވެ.
އިންޑޮނޭޝިއާގެ ފުޑް އެންޑް ޑުރަގް އެޖެންސީއިން މިއަދު މި ވެކްސިން އެމަރޖެންސީ ހަލަތްތަކުގައި އެގައުމުގައި ބޭނުން ކުރުމުގެ ހުއްދަ ދިނުމާއެކު އެގައުމު ވެގެން ގޮސްފައިވަނީ ޗައިނާ ފިޔަވައި މި ވެކްސިން ބޭނުން ކުރުމުގެ ހުއްދަ ދިން ފުރަތަމަ ގައުމަށެވެ.
މި ވެކްސިން އިންޑޮނީޝިއާގެ 1620 މީހަކަށް ދީގެން ކުރިއަށް ގެންދިޔަ ތަހުލީލުތަކުން ދައްކާ ގޮތުގައި މި ވެކްސިނުން ކޮވިޑް-19 ޖެހުމުގެ ފުރުސަތު 65.3 އިންސައްތަ ކުޑަކޮށްދެއެވެ.
އިންޑޮނީޝިއާގެ އާބާދީގައި 260 މިލިއަން ހިމެނޭއިރު އެގައުމުގައި މިހާތަނަށް 836,718 މީހުން ކޮވިޑަށް ޕޮޒިޓިވްވެފައިވެ އެވެ. އަދި މިބަލީގައި 24,343 މީހުން ވަނީ މަރުވެފަ އެވެ.
