ނ. މާފަރު އިންޓަރނޭޝަނަލް އެއަރޕޯޓުގެ ޓަރމިނަލް ބޮޑުކުރުމުގެ މުހިންމު މަސައްކަތް، ޗައިނާގެ ކުންފުންޏެއް ކަމަށްވާ ހުނާން ނަމްބަރ 6 ކުންފުންޏާ މިއަދު ހަވާލުކޮށްފިއެވެ. ޖުމްލަ 3.6 މިލިޔަން ޑޮލަރުގެ މި މަޝްރޫޢަކީ 10 މަސް ދުވަހުގެ ތެރޭގައި ނިންމާ ގޮތަށް ހަވާލުކުރެވުނު މަސައްކަތެކެވެ. މާފަރު އެއަރޕޯޓު ހިންގާ އައިލޭންޑް އެވިއޭޝަން ސާވިސަސް (އައިއޭއެސް) އިން ވިދާޅުވީ، މި މަޝްރޫޢުގެ ސަބަބުން އެއަރޕޯޓުގެ ޚިދުމަތްތައް ފުޅާވެ، ފަސޭހަތައް އިތުރުވެގެންދާނެ ކަމަށެވެ.
މަސައްކަތުގެ ތަފްސީލު
މި އެއްބަސްވުމުގެ ދަށުން، މިހާރު ހުރި ޓަރމިނަލާއި އިންވެގެން ދެ ފަންގިފިލާގެ އިމާރާތެއް ތަރައްޤީކުރާނެއެވެ. މަސައްކަތުގެ އެއްބަސްވުމުގައި އައިލޭންޑް އެވިއޭޝަންގެ ފަރާތުން ސޮއިކުރެއްވީ ކުންފުނީގެ މެނޭޖިންގ ޑިރެކްޓަރ އިބްރާހިމް އިޔާސެވެ. ޗައިނާގެ ހުނާން ނަމްބަރ 6 ކުންފުނީގެ ފަރާތުން ސޮއިކުރެއްވީ އެކުންފުނީގެ ލީގަލް ރެޕްރެޒެންޓޭޓީވް ވަންގް ހީއެވެ.
އައިއޭއެސްއިން ފާހަގަކުރެއްވި ގޮތުގައި، މިހާރުވެސް ކުޑަވެފައިވާ ޖާގައިގެ ޓަރމިނަލަށް، އައު އިމާރާތާއެކު 6238 އަކަފޫޓުގެ އިތުރުވުމެއް ލިބިގެންދާނެއެވެ. މިއާއެކު މުޅި ޖުމްލަ ޓަރމިނަލް ޖާގައަށް 12476 އަކަފޫޓުގެ އިތުރުވުމެއް ލިބިގެންދާނެއެވެ. މި މަޝްރޫޢު ނިމުމުން އެރައިވަލް ހޯލް ބޮޑުކުރެވި، ބެގޭޖް ހޭންޑްލިންގް ބެލްތް ވެސް ބޮޑުކުރެވޭނެއެވެ.
އައު ޚިދުމަތްތަކާއި ފަސޭހަތައް
އައު ޓަރމިނަލް އިމާރާތާއެކު އެއަރޕޯޓުން ދެވޭ ޚިދުމަތްތައް ފުޅާވެގެންދާނެ ކަމަށް އައިއޭއެސްއިން ވިދާޅުވެއެވެ. މިގޮތުން، ފުރަތަމަ ފަންގިފިލާގައި 60 މީހުންގެ ޖާގައިގެ ތަނަވަސް ލައުންޖެއް ޤާއިމްކުރެވޭނެއެވެ. އަދި ގްރައުންޑް ފްލޯގައި 4 ސީއައިޕީ (CIP) ލައުންޖް ޤާއިމްކުރެވޭނެ ކަމަށް އެކުންފުނިން ހާމަކުރެއްވިއެވެ. މި މަޝްރޫޢުގެ ސަބަބުން އެއަރޕޯޓު ބޭނުން ކުރާ ރައްޔިތުންނަށް އަދި ބޭރުގެ ފަތުރުވެރިންނަށް ވަރަށް ގިނަ ފަސޭހަތަކެއް ލިބިގެންދާނެއެވެ.
ސަރުކާރުގެ ސިޔާސަތުތަކާއި މާސްޓަރޕްލޭން
މާފަރު އެއަރޕޯޓުގެ ތަރައްޤީއާ ގުޅޭގޮތުން އައިއޭއެސްއިން ވިދާޅުވީ، ސަރުކާރުގެ ސިޔާސަތުތަކާއި އެއްގޮތަށް މާފަރު ތަރައްޤީ ކުރުމުގެ މާސްޓަރޕްލޭނެއް މިހާރު ތައްޔާރުކުރަމުންދާ ކަމަށެވެ. އަދި އުއްމީދަކީ އެ ޕްލޭންގެ ދަށުން މާފަރުގައި ތަރައްޤީގެ އިތުރު މަޝްރޫޢޫތައް ހިންގުން ކުރިއަށް ގެންދިއުން ކަމަށެވެ. މީގެ ކުރިން މިއަހަރުގެ ޖުލައި މަހު އެރަށުގެ ރައްޔިތުންނާއި ބައްދަލުކުރައްވާ ރައީސުލްޖުމްހޫރިއްޔާ ވަނީ އެއަރޕޯޓުގެ ޚިދުމަތް ފުޅާކުރައްވާނެ ކަމަށާއި، ވަށާޖެހިފައިވާ ފުރިހަމަ އެއަރޕޯޓަކަށް ހެދުމަށްޓަކައި ޓަރމިނަލްގެ މަސައްކަތާއި ހޮޓެލެއްގެ މަސައްކަތްވެސް ކުރައްވާނެ ކަމަށް ވިދާޅުވެފައެވެ.
މާފަރު އެއަރޕޯޓުގެ ފުރަތަމަ ފިޔަވަހީގެ މަސައްކަތް ފަށާފައިވަނީ 23 ޖެނުއަރީ 2018ގައެވެ. އަދި ކޮމާޝަލް ދަތުރުތައް ފެށީ 2019ވަނަ އަހަރުގެ ޑިސެމްބަރުމަހުގެ 1 ވަނަ ދުވަހުއެވެ. ފުރަތަމަ ފިޔަވަހީގެ ދަށުން 2200 މީޓަރުގެ ރަންވޭއަކާއި، ޕެސެންޖަރ ޓަރމިނަލް އިމާރާތާއި ވީއައިޕީ ލައުންޖް ވަނީ ތަރައްޤީކޮށްފައެވެ. މީގެ އިތުރުން ފަޔަރ އެންޑް ރެކްސިއު ސްޓޭޝަނާއި ކޮންޓްރޯލް ޓަވަރު އަދި ޕެސެންޖަރ ޖެޓީ ވެސް ވަނީ ޤާއިމުކޮށްފައެވެ.
