ކުށްވެރިންނަށް އަދަބު ދޭންވާނީ އިންސާނީ ހައްޤާއި ކަރާމާތް ނުގެއްލޭގޮތަށް ކަމަށް ހޯމް މިނިސްޓަރ ޝައިޚް އިމްރާން ޢަބްދުﷲ ވިދާޅުވެއްޖެއެވެ.
ހޯމް މިނިސްޓަރ އިމްރާން ޢަބްދުﷲ މިހެން ވިދާޅުވީ، މިއަދު ހެނދުނު ކުރެއްވި ޓްވީޓެއްގައެވެ. އިމްރާން މިހެން ވިދާޅުވިއިރު، ބޮޑެތި ތުހުމަތުތަކެއް ކުރެވޭ ކުރީގެ ނައިބުރައީސް އަޙްމަދު އަދީބު ޢަބްދުލްޤަފޫރު ބޭސްފަރުވާއަށް މާދަމާ ފުރާނެއެވެ.
"ކުށްކުރާ މީހާގެ އިންސާނީ ހައްޤާއި ކަރާމާތް ނުގެއްލޭނެހެން، ކުރާ ކުށަށް ހައްޤު ޖަޒާ ދެވި އަދުލުއިންސާފު ޤާއިމުކުރެވުމަކީ އަޅުގަނޑުމެން ޤަބޫލުކުރާ ފަލްސަފާ." ހޯމް މިނިސްޓަރ ވިދާޅުވިއެވެ.
ހޯމް މިނިސްޓަރ މިމޭރުމުން ވާހަކަފުޅު ދެއްކެވިއިރު، އަދީބު ބޭސްފަރުވާއަށް ރާއްޖެއިން ބޭރަށް ދިއުމަށްފަހު ނައިސްދާނެކަމަށް ބަލައި، ރައްޔިތުންގެ މަޖިލީހުގެ މެންބަރުން ވަނީ ކަންބޮޑުވުން ފާޅުކުރައްވާފައެވެ.
އެ މައްސަލައިގައި ފުލުހުންނާއި، ކަސްޓަމްސް އަދި ޕްރިޒަންސްގެ އިތުރުން ހޯމް މިނިސްޓްރީގެ ވެރިންވެސް އިއްޔެ ވަނީ ރައްޔިތުންގެ މަޖިލީހަށް ހާޒިރުކޮށް ސުވާލުކޮށްފައެވެ.
އަދީބު ބޭސްފަރުވާއަށް މާދަމާ ފުރާވަޑައިގަންނަވާއިރު މިމަހުގެ 26 ވަނަ ދުވަހު އެނބުރި ވަޑައިގަންނަވާނެކަމަށް އިއްޔެ މަޖިލީހުގައި މިނިސްޓަރ ވިދާޅުވިއެވެ.
އަދީބުގެ ސަލާމަތީ ކަންކަން ބެލެހެއްޓުމަށް ފުލުހުންނާއި ކަރެކްޝަންސްގެ 7 ބޭފުޅުންގެ ޓީމެއް ވަޑައިގަންނަވާއިރު، އަދީބު އިންޑިއާއިން ފިލައިފިނަމަ އެއީ މުޅި ސަރުކާރުވެސް ފެއިލްވުންކަމަށް މިނިސްޓަރ އިއްޔެ ވިދާޅުވިއެވެ.
