އަންނަ މަހުގެ 10 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި ރީރެޖިސްޓްރީ ކުރި 8000 ފަރާތެއް އަލުން ރީ ރެޖިސްޓްރީ ކުރަން އިލެކްޝަން ކޮމިޝަނުން ނިންމައިފިއެވެ.
އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ، ރީ ރެޖިސްޓްރޭޝަން ނިމުނުއިރު 8000 ފަރާތެއްގެ ވޯޓުގެ ސިއްރުކަން ގެއްލޭ ފަދަ ގޮތަކަށް ރީ ރެޖިސްޓްރީ ކޮށްފައިވާކަމަށެވެ.
އެހެންކަމުން މި ފަރާތްތަކުން އަލުން މިހާރު ރެޖިސްޓަރ ކޮށްފައިވާ ތަން ނޫން އެހެން ތަނަކަށް ރެޖިސްޓަރ ވުމުގެ ފުރުސަތު ހުޅުވާލާކަމަށެވެ. ޝަރީފް ވިދާޅުވީ، މި ހަފްތާގައި ފުރުސަތު ހުޅުވާލެވިފައިވާކަމަށެވެ.
Reregistration nimunu iru 8000 farathehge votege sirrukan gehley fadha gothakah reregister kohfaivey, mi faraithah alun mihaaru register kohfaa vaa than noon ehen thanakah register vaan mi hafthaa ga furusathu hulhuvaalaanan
— Ahmed Shareef (@ShareefRangondi) March 17, 2021
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ރީރަޖިސްޓްރޭޝަނަށް ހުޅުވާލާފައިވަނީ މިމަހުގެ 2 ވަނަ ދުވަހުއެވެ. ރީ-ރަޖިސްޓްރޭޝަންގެ މުއްދަތު ހަމަވީ މިމަހުގެ 11 ވަނަ ދުވަހުއެވެ. މުއްދަތު ހަމަވިއިރު އެ ކޮމިޝަނަށް 26،750 ފޯމް ވަނީ ހުށަހަޅާފައެވެ.
މި އިންތިޚާބުގައި ޖުމްލަ 3934 ކެނޑިޑޭޓުން ވާދަކުރާނެއެވެ. އޭގެ ތެރޭގައި ހިމެނެނީ ލޯކަލް ކައުންސިލް އިންތިޚާބުގައި ވާދަކުރާ 2264 ކެނޑިޑޭޓުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރާ 1670 ކެނޑިޑޭޓުންނެވެ.
