ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ފިކުރު ނައްތާނުލެވޭނެކަން މިމަހު ބޭއްވުނު ލޯކަލް ކައުންސިލް އިންތިޚާބުގައި ރައްޔިތުން ސާބިތުކޮށްދީފިކަމަށް ކޯލިޝަންގެ ވަގުތީ ލީޑަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އަދުރޭ ވިދާޅުވީ، ދިވެހި ލޮބުވެތި ރައްޔިތުން އެކަން ސާބިތުކޮށްދީފައިވަނީ ރައީސް ޔާމީން ޖަލުގައި ބާއްވައި އަދި ރައީސް ޔާމީންގެ ޕާޓީގައި ތަޅު އަޅުވައިފައިވަނިކޮށްކަމަށެވެ.
"ރައީސް ޔާމީން ޖަލުގައި ބާއްވާފައި، ރައީސް ޔާމީންގެ ޕާޓީގައި ތަޅު އަޅުވައިގެން ސަރުކާރުން ބޭއްވި ލޯކަލް ކައުންސިލް އިންތިޚާބުން ރައީސް ޔާމީންގެ ފިކުރު ނައްތާނުލެވޭނެކަން ދިވެހި ލޮބުވެތި ރައްޔިތުން މިވަނީ ސާބިތުކޮށްދީފަ" އަދުރޭ ވިދާޅުވިއެވެ.
އަދުރޭ މިހެން ވިދާޅުވެފައިވާއިރު، މިއަދުގެ ވަގުތެއްގައި ރައީސް ޔާމީންވަނީ މާލެ ގެނެސްފައެވެ. މިއަދު ހެނދުނު އެމަނިކުފާނު މާލެ ގެނެސްފައިވަނީ، އެމްއެމްޕީއާރުސީގެ ހިޔާނާތާ ގުޅޭ މައްސަލައެއްގެ ބަޔާނެއް ނެގުމަށެވެ.
RY nuhaggun jalugai baahvaafai RY ge party thalhu alhuvaigen sarukaarun beyhvi LC Inthikh’aabun RY ge fikuru nahthaa nuleveynekan lobuvethi Dhivehi rayyithun mi vanee saabithu kohdheefa #ShukuriyyaalobuvethiRayyithun #MaruhabaaRaeesYameen #RaeesYameenMinivankurey #MeeMageyRaajje
— Abdul Raheem Abdulla (@Banafsaa) April 18, 2021
މިމަހު 10 ވަނަ ދުވަހު ބޭއްވުނު ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި އިދިކޮޅު ޕީޕީއެމްއަށް އެންމެ ބޮޑު ކާމިޔާބީއެއް ލިބުނީ ވެރިރަށް މާލެއިންނެވެ. އެގޮތުން 11 އަހަރަށްފަހު ޕީޕީއެމްއިންވަނީ މާލޭގެ ކައުންސިލްގެ މެޖޯރިޓީ އެމްޑީޕީ އަތުން އަތުލާފައެވެ. އިދިކޮޅުގެ ކެންޑިޑޭޓް ޑރ. މުހައްމަދު މުއިއްޒު މާލެ ސިޓީގެ މޭޔަރު ކަމަށް އިންތިހާބުވެވަޑައިގެންފައިވަނީ ބޮޑު ތަފާތަކުން އެމްޑީޕީގެ ކެންޑިޑޭޓު އަނަސް ބަލިކުރެއްވުމަށްފަހުގައެވެ.
އަދި އެމްޑީޕީއަށް ތާޢީދުކޮށްގެން 11 އަހަރު ހުރުމަށްފަހު މާލެ ރައްޔިތުން ބަދަލެއް ބޭނުންވީ ރައްޔިތުން ބޭނުންވާ ކަންކަން މާލޭ ސިޓީ ކައުންސިލަށް ނުކުރެވޭތީކަމަށް އިދިކޮޅު ލީޑަރުން ސިފަކުރެއެވެ.
