ރާއްޖެއަށް މިހާރު ކުރަމުންދާ ހުޅަނގު މޫސުމުގެ ގަދަ ވިއްސާރައިގައި ހއ. ހޯރަފުށީ އެއާޕޯޓުގައި ފެންބޮޑުވެ އެ އެއާޕޯޓުގެ ވައިގެ ދަތުރުތައް މެދުކަނޑާލައިފިއެވެ.
ހޯރަފުށި އެއާޕޯޓުގައި ފެންބޮޑުވެ ދަތުރުތައް މެދުކަނޑާލައިފައިވާއިރު ހޯރަފުށީ ކައުންސިލްގެ މެންބަރުޢަލީ ނަޞީރު އާދަމް މިނޫހަށް މައުލޫމާތު ދެއްވަމުން ވިދާޅުވީ، އެރަށަށް އުދައަރަންފަށާފައި ވަނީ މިއަދު މެންދުރުއެވެ. އެގޮތުން މިހާރު ވަނީ ރަށުގެ ވަރަށް ބޮޑު ސަރަހައްދަކަށް އުދައަރާ މީހުން ދިރިއުޅެމުން އަންނަ ގިނަ ގެތަކަކަށްވެސް ލޮނުގަނޑު ވަދެފައެވެ.
Hoarafushi Airport Ah Huttumehnethi Raalhu Aranee. pic.twitter.com/nwYULZbMYL
— Ali Wisam (@wii_saam) May 14, 2021
އެއަރޕޯޓް ސަރަހައްދަށްވެސް ވަރަށް ބޮޑަށް އުދައަރާ ރަންވޭ މައްޗަށްވެސް ވެލިގަނޑު އަރުވާލާފައިވާކަމަށާއި، އެއަރޕޯޓަށް ދާން އޮންނަ މަގަށްވެސް ވަރަށް ބޮޑަށް އުދަ އަރާފައިވާ ކަމުގައި ޢަލީ ނަޞީރު ވިދާޅުވިއެވެ.
މީސްމީޑިއާ އެކި ވެބްސައިޓުތަކުގައި ދައުރުވަމުން އަންނަ ފޮޓޯތަކުން ފެއްނަގޮތުގައި އެއާޕޯޓުގައި އެއްކޮށް އޮތީ ފެންހެދިފައެވެ. އަދި ބޯޓު ޖެއްސުމަށް ބޭނުންކުރާ ރަންވޭ މައްޗަށްވެސްވަނީ ވެލި އަރުވާލައިފައެވެ.
ހޯރަފުއްޓަށް އިއްޔެކުރި ވިއްސާރައިގައިވެސް އެއާޕޯޓަށް ގެއްލުންތަކެއް ލިބިފައި ވެއެވެ. މިގޮތުން އިއްޔެ ގަދަވަޔާއެކު ކުރި ވިއްސާރައިގައި އެއާޕޯޓް ޓާމިނަލްގެ ދޮރުތައްވަނީ ހަލާކުވެފައެވެ.
މޫސުމާބެހޭ ގައުމީ އިދާރާއިން މޫސުން ލަފާކޮށް މިއަދު ބުނެފައިވަނީ، ހއ.އަތޮޅުން ފެށިގެން ޅ.އަތޮޅާ ދެމެދުގެ ރައްތަކަށް މިއަދު މެންދުރުފަހު 03:15 އިން ހަވީރު 05:15 އަށްބޯކޮށް ވާރޭވެހި ފެންބޮޑުވެ، ގަޑިއަކު 34 މޭލާއި 40 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި 60 މޭލަށް ވައިގަދަވެ، ކަނޑުތައް ގަދަވެ ރާޅުއަރާނެކަމަށް ލަފާކުރެވިފައިވާ ކަމަށެވެ.
ހިޔާލު
ކެންމްޕެއުނަށް ފީއިލޮށިން ތަންތަން ހެދީމަ ވާގޮތް ޓާމިނަލް ވެސް ހަލާކުވީ ތިޔައްވުރެ މާކުރިން އެޅި ތަންތަން ހަނިމާދޫ އެއާޕޯޓް ހަމަ ތިސަރަހައްދުން އެހުރީ ގޮތެއްނުވެ