އެމްޑީޕީގެ މަސައްކަތް ދެބައިވީ މޯލްޑިވްސް ޑިމޮކްރެޓިކް ޕާޓީ (އެމްޑީޕީ) ރައީސް ނަޝީދު އެކަހެރިކޮށް ސަރުކާރު ހިންގަން އުޅުމުންކަމަށް އެޕާޓީގެ ޗެއާޕާސަން ހަސަން ލަތީފް ވިދާޅުވެއްޖެއެވެ.

އެގޮތުން ހަސަން ލަޠީފް ވިދާޅުވީ، އެމްޑީޕީގެ މަސައްކަތް ދެބައިވީ ޕާޓީއިން ކުރަންބުނި ކަންކަން ކުރަން ސަރުކާރުން ބޭނުންނުވީމައި ކަމަށެވެ. އަދި ސަރުކާރުން ޕާޓީގެ ގުޅުން ހީނަރުކޮށްފައިވާކަމަށް ހަސަން ލަޠީފު ތުޙުމަތުކޮށްފައިވާއިރު، އެމްއެމްޕީއާރުސީއާ ކޮރަޕްޝަންގެ މައްސަލަތައް ބަލަން ސަރުކާރުން ފޫކެހުމަކީވެސް ޕާޓީގެ މަސައްކަތް ދެބައިވުމަށް ދިމާވި ސަބަބެއްކަމަށް އޭނާ ވިދާޅުވިއެވެ.

"ޖުމްލަކޮށް ރައީސް ނަޝީދު އާ، އެމްޑީޕީ އެކަހެރިކޮށް ސަރުކާރު ހިންގަން އުޅުނީމަ." ހަސަން ލަޠީފް ވިދާޅުވިއެވެ.

Masakkaiy dhe baivee @MDPSecretariat in vaudhuvi kankan kuran Sarukarun beynun nuveema. MMPRC aa corruption ge massalathah balan Sarukarun fookahan fesheema. Sarukara Party ge gulhun heenarukolleema. Jumlakoh R. @MohamedNasheed aa Party ekkairikoh Sarukaru hingan ulhuneema. pic.twitter.com/97tQ3RxRAU

— Hassan Latheef???? (@HassanLatheef) June 11, 2021

އެމްޑީޕީގެ އެތެރޭގައި މައްސަލަގަނޑޫ ބޮޑުވެގެން އުޅެނީ ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝިދު އަވަހާރަކޮށްލުމަށް ދިން ޓެރަރިސްޓް ހަމަލާއަށް ފަހުގައެވެ.

އެގޮތުން އެ މައްސަލައިގެ އިންކުއަރީއެއް މަޖިލީހުން ހަދަމުން އަންނައިރު، އެ ތަހުގީގްގެ މިސްރާބު ބަދަލުކޮށްލުމަށް ސަރުކާރުން މަސައްކަތްކުރާކަމަށް، ރައީސް ނަޝީދަށް ތާޢީދުކުރައްވާ އެމްޑީޕީ މަޖިލިސް ބައެއް މެންބަރުން ދަނީ ވިދާޅުވަމުންނެވެ. އެމްޑީޕީގެ ގައުމީ މަޖިލީހުގެ މެމްބަރުން ތިއްބަވާ ވަޓްސްއެޕް ގުރޫޕްގައި މިމައްސަލަ ވަރަށް ބޮޑަށްވަނީ ހޫނުވެފައެވެ.

މިފަދަ ތުޙުމަތެއް ކުރަމުންދާއިރު، މި މައްސަލައިގެ އިންކުއަރީއަށް ހުރަސްނާޅާނެކަން ނަޝީދަށް އެނގިވަޑައިގަންނަވާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހްވަނީ މީގެކުރިން ވިދާޅުވެފައެވެ. އަދި ވިދާޅުވެފައިވަނީ ނަޝީދަށް ދިން ހަމަލާ ސަރުކާރުން ބަލައި ނުގަންނަކަމަށާއި، މިއީ ސިޔާސީ ހަލަބޮލިކަމެއްގެ ތެރެއަށް ގައުމު ދާންވީ ވަގުތެއް ނޫންކަމަށެވެ.