ކޮވިޑް-19 އިން ދިފާއުވުމަށް އިންޑިއާއިން އުފައްދަމުން އަންނަ ކޮވިޝީލްޑް ވެކްސިންގެ ފޭކް ޑޯޒް ތަކެއް ދައުރުވަމުން އަންނަކަމަށް ފާހަގަވެފައިވާތީވެ، ދުނިޔޭގެ ސިއްހަތު ޖަމިއްޔަ (ޑަބްލިއުއެޗްއޯ) އިން މެޑިކަލް އެލާޓް ނެރެފިއެވެ.
މިކަމާއި ގުޅިގެން ޑަބްލިއުއެޗްއޯ އިން ނެރުނު ބަޔާނެއްގައި ބުނީ، މިދިޔަ މަހާއި ޖުލައި އާއި އޯގަސްޓް މަހާ ދޭތެރޭ، އިންޑިއާ އާއި އެފްރިކާއިން ، ކޮވިޝީލްޑްގެ ފޭކު ޑޯޒްތަކެއް އަތުލައިގަނެވިފައިވާ ކަމަށެވެ. އަދި މި ވެކްސިން އުފައްދާ ސެރަމް އިންސްޓިޓިއުޓް އޮފް އިންޑިއާ އިން އެ ވެކްސިންގެ ޑޯޒު ތަކަކީ ފޭކް ޑޯޒު ތަކެއް ކަމަށް ކަށަވަރުކޮށްދީފައިވާ ކަމަށް އެ ބަޔާނުގައި ބުނެފައިވެއެވެ.
ޑިބްލިއުއެޗްއޯ އިން ބުނީ، މި ފޭކް ވެކްސިންތަކަކީ އާލަމީ ވަބާއެއް ފެތުރޭ މި ދުވަސްވަރު ސިއްހީ ނިޒާމަށް އޮތް ނުރައްކަލެއް ކަމަށެވެ. އަދި ފޭކު ވެކްސިން ޑޯޒްތައް ދައުރު ކުރުން ހުއްޓުވާލުމަށްވެސް އެ ޖަމިއްޔާ އިން ވަނީ ގޮވާލައިފައެވެ.
މިކަމާއި ގުޅިގެން އިންޑިއާ ސަރުކާރުން އަދި އެއްވެސް ބަހެއް ނުބުނިކަމުގައިވިޔަސް، ރިޕޯޓުތައް ބުނާގޮތުން އެ ގައުމުގެ ހެލްތް މިނިސްޓްރީން އަންނަނީ މި މައްސަލަ ތަހުޤީގުކުރަމުންނެވެ.
އެގޮތުން މީޑިއާގައި ނަން ހާމަ ނުކުރުމަށް އެދިވަޑައިގެން، މިންޓް ނިއުސްއާ ވާހަކަދައްކަވަމުން އިންޑިއާގެ ސިއްހަތާ ބެހޭ އޮފިޝަލަކު ބުނީ، މިވަގުތަށް މިކަން ހުއްޓުވޭނެ ގޮތެއް ނެތް ކަމުގައިވިޔަސް، އެއްވެސް މީހަކަށް ފޭކް ޑޯޒެއް ނުދެވޭކަން ކަށަވަރުކުރުމަށް ބޭނުންވާކަމަށެވެ.
ކޮވިޝީލްޑްއަކީ، އިނގިރޭސިވިލާތުގެ އޮކްސްފޯޑް ޔުނިވާސިޓީއާއި އަސްޓްރާޒެނީކާ ކުންފުނީގެ ކޮވިޑް ވެކްސިން ފޯމިއުލާއަށް އެސްއައިއައިން ތަރައްކޮށް، އެ ގައުމުގައި އެންމެ ފުޅާކޮށް ބޭނުންކުރަމުންދާ ކޮވިޑް ވެކްސިނެވެ.
