1994 ވަނަ އަހަރު ފެށި ކާމިޔާބު ޓީވީ ޝޯ "ފްރެންޑްސް" ގައި މޮނިކާގެ ބައި ކުޅެދީފައިވާ އެކްޓްރެސް "ކޯޓްނީ ކޯޒް" ގެ 55 ވަނަ އުފަންދުވަސް މިދިޔަ ހޮނިހިރު ދުވަހު، އޭނަ އެންމެ ގާތް ދެ އެކުވެރިން އަދި ޝޯ ގައިވެސް ބެސްޓް ފްރެންޑްސް ގެ ގޮތުގައި ފެނިގެންދާ، ފީބީ ( ލީސާ ކުޑްރޯ) އަދި ރޭޗަލް ( ޖެނިފާ އެނިސްޓަން) އާއިއެކު ފާހަގަކޮށްފިއެވެ.
މިއީ ހަމަގައިމުވެސް މި ތިން އެކުވެރިންގެ ރީޔުނިއައަކަށް އިންތިޒާރުކޮށްގެން ތިބި "ފްރެންޑްސް" ގެ ފޭނުންނަށް ފެނިގެންދިޔަ ވަރަށް އުފާވެރި މަންޒަރެކެވެ.
ކޯޓްނީ އޭނަގެ އުފަންދުސް ލީސާ އަދި ޖެނިފާ އާއެކު ފާހަގަކޮށް ނަގާފައިވާ ސެލްފީއެއް އިންސްޓަގްރާމްގައި ހިއްސާކޮށްފައިވާއިރު، "މި ދެ އެކުވެރިންނާއެކު އަހަރެންގެ އުފަންދުވަސް ފާހަގަ ކުރުމަކީ ލިބިގެންދާ ނަސީބެއް" ކަމަށް ފޮޓޯ ގެ ކެޕްޝަންގައި ލިޔެފައިވެއެވެ.
ޓީވީގެ ތާރީހުގައި އެންމެ ގިނަ ބަޔަކު ބެލި އެއް ސީރީޒް "ފްރެންޑްސް" ނިއްމާލިތާ މިހާރު 15 އަހަރުވެފައިވާއިރު، ޝޯ ނިމުމަށްފަހުވެސް މި ތިން އެކްޓަރުންގެ މި އެކުވެރިކަމަށް އެއްވެސް ބަދަލެއް އައިސްފައެއްނުވެއެވެ. އަދި މި ތިން މީހުންގެ އެކުވެރިކަމަކީ، ހޮލީވުޑްގެ އެހެން އެކްޓަރުންނަށް ނަމޫނާއެކެވެ.
ހަ އެކުވެރިންގެ ދިރިއުޅުމުގެ ތެރޭގައި ހިނގާ މަޖާ، ލޯބީގެ ކަންތައްތަކެއް މި ސީރީޒްގައި ފެނިގެންދާއިރު. ހަޤީޤީ ދިރިއުޅުމުގައިވެސް މި ހަ އެކުވެރިންނަކީ ގާތް އެކުވެރިންނެވެ. "މޮނިކާ، ރެޗަލް، ފީބީ، ރޮސް، ޗޭންޑްލާރ އަދި ޖޯއީ" ގެ ކެރެކްޓަރ ކުޅެދީފައިވާ މި ހަ އެކްޓަރުންނަކީ ޓީވީ ތާރީޙުގައި ލެޖެންޑްސްއެވެ.
1994 ވަނަ އަހަރުން ފެށިގެން 2004 ވަނަ އަހަރާއި ހަމަ އަށް ގެނެސްދިން މަޝްހޫރު ޓީވީ ސީރީސް “ފްރެންޑްސް” ގެ 10 ސީޒަން ދައްކާފައިވާ މި ސިރީޒްގެ މަޤްބޫލުކަމަށް އަދިވެސް ފަނޑުކަމެއް އައިސްފައިނުވާއިރު މިއީ ދިވެހި ޒުވާނުންގެ މެދުގައިވެސް މަޤުބޫލު ސީރީޒްއެކެވެ
