މި މަހުގެ ފުރަތަމަ 13 ދުވަސްތެރޭ ދިވެހިރާއްޖެއަށް 62،027 ފަތުރުވެރިން ޒިޔާރަތްކޮށްފައިވާކަމަށް ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 18.7 އިންސައްތައިގެ ކުރިއެރުމެކެވެ.
މި އަހަރުގެ މިހާތަނަށް ރާއްޖެއަށް ޒިޔާރަތްކޮށްފައިވާ ޖުމްލަ ފަތުރުވެރިންގެ އަދަދު ވަނީ 1.5 މިލިއަނަށް އަރާފައެވެ. މިއީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި 1.4 މިލިއަން ފަތުރުވެރިންނާ އަޅާބަލާއިރު 9.7 އިންސައްތައިގެ އިތުރުވުމެކެވެ.
ތަފާސްހިސާބުތަކުން ދައްކާގޮތުގައި ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ޤައުމަކީ ޗައިނާއެވެ. މިގޮތުން ޗައިނާއިން 245،553 ފަތުރުވެރިން ޒިޔާރަތްކޮށްފައިވާއިރު، ރަޝިއާއިން 186،263 ފަތުރުވެރިން، އިނގިރޭސިވިލާތުން 138،869 ފަތުރުވެރިން، އިޓަލީވިލާތުން 108،837 ފަތުރުވެރިން އަދި ޖަރުމަނުވިލާތުން 106،919 ފަތުރުވެރިން ޒިޔާރަތްކޮށްފައިވެއެވެ.
ސަރުކާރުން މި އަހަރަށް އަމާޒުކޮށްފައިވަނީ 2.3 މިލިއަން ފަތުރުވެރިން ރާއްޖެއަށް ގެނައުމަށެވެ. މި އަމާޒު ހާސިލުކުރުމަށް އިތުރަށް ބޭނުންވަނީ 700،000 ފަތުރުވެރިންނެވެ. ފަތުރުވެރިކަމާ ބެހޭ ވުޒާރާއިން ވިދާޅުވެފައިވަނީ މިހާރުގެ ހަލުވި ދުވެލީގައި ކުރިއަށްދާނަމަ، މި އަހަރަށް ކަނޑައެޅި އަމާޒު ހާސިލުވާނެކަމުގެ އުންމީދު ބޮޑުކަމަށެވެ.
