ކުރިއަށްހުރި ގައުމީ ފެންވަރުގެ އިންތިޚާބުތަކުގައި ވާދަކުރާނެ ކެންޑިޑޭޓުން ހޮވުމަށް ޖުމްހޫރީ ޕާޓީންވެސް ޕްރައިމަރީ އަށް ދިއުމަށް ނިންމާފައިވާ ކަމަށް އެ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެއެވެ.
ޖޭޕީ އަށް އަލަށް ގުޅިވަޑައިގެންނެވި ބޭފުޅަކު އެ ޕާޓީ އަށް ސޮއިކުރެއްވުމަށް ބޭއްވި ރަސްމިއްޔާތެއްގައި ގާސިމް ވިދާޅުވީ، އިންތިޚާބަކަށް އެކަކަށް ވުރެ އިތުރަށް މީހަކު ކުރިމަތި ލައިފި ނަމަ ޕްރައިމަރީ ބާއްވަން ނިންމީ ޖޭޕީގެ ކައުންސިލްގެ އެންމެ ފަހުގެ ބައްދަލުވުމުގައި ކަމަށެވެ.
މީގެ ކުރިން ޖުމްހޫރީ ޕާޓީން ބޮޑެތި އިންތިޚާބުތަކަށް ކެންޑިޑޭޓުންނަށް ޓިކެޓް ދީފައިވަނީ ޕްރައިމަރީއަކާ ނުލައި، ލީޑަރޝިޕަށް ފެނިވަޑައިގަންނަވާ ފަރާތްތަކަށެވެ. އެކަމުގެ ސަބަބުނ ނިމިދިޔަ މަޖިލިސް އިންތިޚާބުގައިވެސް ޕާޓީގެ އެތެރޭގައި ޚިޔާލުތަފާތުވުންތަކެއް އުފެދުނެވެ.
ރައްޔިތުންގެ މަޖިލީހުގެ އިންތިޚާބާއި ލޯކަލް ކައުންސިލްތަކުގެ އިންތިޚާބުގައި ވެސް ޖޭޕީގެ ޓިކެޓުގައި ދެން ވާދަކުރަން އެކަކަށް ވުރެ ގިނައިން މީހުން ކުރިމަތިލައިފި ނަމަ އެކަމުގައި ގޮތެއް ކަނޑައަޅާނީ ޕްރައިމަރީ އަކުން ކަމަށް މާމިގިލީ ދާއިރާގެ މެމްބަރުކަން ކުރައްވާ، ރައްޔިތުންގެ މަޖިލީހުގެ ކުރީގެ ރައީސް ގާސިމް ވިދާޅުވިއެވެ.
"ވާދަވެރި މާހައުލެއްގައި، އެއް ބޭފުޅަކަށް ވުރެ ގިނަ ބޭފުޅުން ގުޅިވަޑައިގަންނަވަން ބޭނުންފުޅުވާ ނަމަ ކުރިއާ ހިލާފަށް އަޅުގަނޑުމެން ބޭނުން، ޕްރައިމަރީއެއް ބާއްވައިގެން ކޮންމެ ކަމެއް ވެސް ކުރިއަށް ގެންދާ ގޮތަށް ނިންމަން،" ރައްޔިތުންގެ މަޖިލީހުގެ ކުރީގެ ރައީސް ގާސިމް ވިދާޅުވި އެވެ.
ގާސިމް ވިދާޅުވީ، އެކި ރަށްރަށަށް ވެސް ދަތުރު ކުރައްވައި ޕާޓީ އަށް މީހުން އިތުރު ކުރާނެ ކަމަށާއި، ޕާޓީއަށް އެ ނޫން ވެސް އިސްލާހީ ބަދަލުތަކެއް އަންނާނެއެވެ. އަދި އެ ކަންކަން މީޑިއާ އަށް ވަރަށް އަވަހަށް ހާމަކުރައްވާނެ ކަމަށް ވިދާޅުވި އެވެ.
"ހަމަ މިއާ އެކީ ގައި އަޅުގަނޑުމެން މި އަހަރު ނިމުމުގެ ކުރީގައި އަޅުގަނޑުމެން ގަބޫލުކުރާ ގޮތުގައި ޕާޓީ އަށް މެމްބަރުން އިތުކުރަން ރާއްޖޭގެ ހުރިހާ ކަންކޮޅަކަށް އަޅުގަނޑުމެން ދަތުރުކުރާނަން އިރާދަކުރެއްވިއްޔާ،" ގާސިމް ވިދާޅުވި އެވެ.
