ދިވެހިރާއްޖޭގެ މައި ވައިގެ ބަނދަރު، ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ މަޝްރޫއުގެ ދަށުން ކުރިއަށްދާ އާ ސީޕްލޭން ޓާމިނަލްގެ މަސައްކަތް ނިމުމަކާ ކައިރިވެއްޖެއެވެ.
ވެލާނާ އެއާޕޯޓް ހިންގާ، މޯލްޑިވްސް އެއާޕޯޓްސް ކޮމްޕެނީ ލިމިޓެޑް އިން ވިދާޅުވީ، އާ ސީޕްލޭން ޓާމިނަލްގެ ސްޓްރަކްޗަރގެ މަސައްކަތާއި، ޒަމާނީ ސިޑިތައް އިންސްޓޯލް ކުރުމުގެ މަސައްކަތް މުޅިން ނިމިފައިވާ ކަމަށާއި، މިހާރު ކުރިއަށްދަނީ އިމާރާތުގެ މޫނުމަތީގައި ހަރުކުރަންޖެހޭ ތަކެތި ހަރުކުރުމުގެ މަސައްކަތް ކަމަށެވެ.
ދެ ސީޕްލޭން ޑޮކް އިންސްޓޯލްކޮށް ނިމިފައިވާ ކަމަށާއި، އާ އިމާރާތުގެ ކަރަންޓް ވައިރިންގ އަދި ފެންވައިރިންގ ގެ އިތުރުން އެއަރކޮންޑިޝަނިންގ ގެ މަސައްކަތް މިހާރު ކުރިއަށްދާކަމަށްވެސް އެމްއޭސީއެލް އިން ވިދާޅުވިއެވެ.
40 މިލިއަން ޑޮލަރު ޚަރަދުކޮށްގެން ޒަމާނީ ފެންވަރަށް ތަރައްޤީކުރާ އާ ސީޕްލޭން ޓާމިނަލްގެ މަސައްކަތް ފަށާފައިވަނީ، މިދިޔަ އަހަރުގެ ޖެނުއަރީ 29 ވަނަ ދުވަހު އެވެ.
އާ ސީޕްލޭން ޓާމިނަލްގެ މަސައްކަތް ނިންމާ، ހުޅުވަން ތާވަލް ކޮށްފައި ވަނީ މިއަހަރުގެ ސެޕްޓެމްބަރ މަހުއެވެ.
