ރައީސް ޢަބްދުﷲ ޔާމީން ޢަބްދުލްޤައްޔޫމް އައިޖީއެމް ހޮސްޕިޓަލަށް ގެނައި ވަގުތު އެ ހޮސްޕިޓަލްގެ ތެރޭގައި ޕެޕަރ ސްޕްރޭ ބޭނުންކުރި ކަމަށާއި، އެއީ އެންމެ ކުޑަ މިންވަރު ކަމަށް މޯލްޑިވްސް ޕޮލިސް ސަރވިސް އިން ވިދާޅުވެއްޖެއެވެ.
ފުލުހުން ދާދި ދެންމެ ނެރުނު ނޫސްބަޔާނެއްގައި ވިދާޅުވީ، ޔާމީން އައިޖީއެމް ހޮސްޕިޓަލަށް ޑޮކްޓަރަށް ދެއްކުމަށް ގެންނެވި ވަގުތު އެމަނިކުފާނަށް ތާއީދުކުރާ ބަޔަކު އެ ހޮސްޕިޓަލުގެ ހުޅަނގު ގޭޓުން ވަދެ "ކާޑިއޮލޮޖީ ސެންޓަރ" ތެރެއަށް ވަންނަން މަސައްކަތް ކުރުމުން ފުލުހުން ތަކުރާރުކޮށް އެސަރަހައްދަށް ގިނަ ބަޔަކު އެއްފަހަރާ ނުވަނުމަށް އެންގުމުންވެސް ނުކިޔަމަންތެރިކަން ދައްކައި، އަޑުގަދަކޮށް ގަދަކަމުން ހޮސްޕިޓަލް ތެރެއަށް ވަންނަނަ ބަޔަކު މަސައްކަތް ކޮށްފައިވާ ކަމަށެވެ.
"އެކަން ހުއްޓުވާ ކޮންޓްރޯލް ކުރުމަށް ފުލުހުން ޕެޕަރ ސްޕްރޭ ބޭނުންކުރަން ޖެހުނު. އެސަރަހައްދުގައި ހިނގަން އުޅުނު ހަމަނުޖެހުން ކޮންޓްރޯލް ކުުރުމަށްޓަކައި ފުލުހުން ޕެޕަރ ސްޕްރޭ ބޭނުންކޮށްފައިވާނީ އެހާލަތުގައި ބޭނުންކުރަން ޖެހުނު އެންމެ ކުޑަ މިންވަރަށް." ފުލުހުންގެ ބަޔާނުގައި ވިދާޅުވެފައިވެއެވެ.
ފުލުހުން އިތުރަށް ވިދާޅުވީ، ފުލުހުން ބާރުގެ ބޭނުންކުރާ ހާލަތްތަކުގައި ބާރު ބޭނުން ކުރެވުނު ގޮތް ރިވިއުކުރުމަށް އެކުލަވާލާފައިވާ "ޔޫސް އޮފް ފޯސް ރިވިއު ކޮމެޓީ" އިން މިއަދު ހާދިސާގައި ފުލުހުން ބޭނުންކުރި ބާރާއި، އެބާރު ބޭނުންކުރެވުނު ހާލަތު ދިރާސާކޮށް ރިވިއު ކުރާނެ ކަމަށެވެ.
ހޮސްޕިޓަލެއްގައ ފުލުހުން ޕެޕަރ ސްޕްރޭ ބޭނުންކުރިއިރު، އެކަމުގެ ސަބަބުން ބައެއް ފަރާތްތަކަށް އަނިޔާވެފައިވެއެވެ. ފުލުހުންގެ އެ އަމަލު ކުށްވެރި ކުރައްވާކަމަށް ކުރީގެ ފިޝަރީޒް މިނިސްޓަރ މުޙައްމަދު ޝައިނީ ވަނީ ވިދާޅުވެފައެވެ.
