2013 ވަނަ އަހަރު ނުކުތް ކާމިޔާބު ޑިޒްނީ ކާރޓޫން މޫވީ “ފްރޯޒެން”ގެ ސީކުއަލް “ފްރޯޒެން 2" ގެ އާ ލަވައިގެ ހާއްސަ ފެނިލުމެއް ދައްކާލައިފިއެވެ. މި ފަހަރުގެ ލަވައިގެ ނަމަކީ، "އިންޓު ދި އަންނައުން" އެވެ.
ފްރޯޒެންގެ ފުރަތަމަ ބައިގައި ގެނެސްދިން ލަވަ "ލެޓް އިޓް ގޯ" އަކީ، އާއްމުންގެ މެދުގައި ވަރަށް ބޮޑު މަގުބޫލުކަމެއް ހޯދި ލަވައެކެވެ. އަދި އެ އަހަރު މި ލަވަ ވަނީ އެންމެ މޮޅު އޮރިޖިނަލް ލަވައިން އޮސްކާ އެވޯޑްވެސް ހޯދައިފައެވެ.
މިފަހަރުގެ ބައިން ފެނިގެންދާނެ އާ ލަވަ "އިންޓު ދި އަންނައުން"ގެ ތަންކޮޅެއް ކާޓޫންގެ މަންޒަރުތަކާއެކު މިހާރު ދައްކާލައިފައިވާއިރު، މި ލަވަ އަޑުއަހާލުމަށް ވަރަށް ހިތްގައިމެއެވެ.
ގިނަބަޔަކު އިންތިޒާރުކުރަމުން އަންނަ ފްރޯޒެން 2 ގެ ފުރިހަމަ ޓްރެއިލާއެއްވެސް މިހާރު ދައްކާލައިފައިވާއިރު، މިފަހަރުގެ ފިލްމްވެސް ވަރަށް ޝައުގުވެރިވާނެކަން ޓްރެއިލާއިންވެސް ބުނެދެއެވެ.
“ފްރޯޒެން”ގެ ފުރަތަމަ ބައިން ފެނިގެންދަނީ، “އެލްސާ” އަދި “އާނާ” އެމީހުންގެ މައިންބަފައިން ކުރާ ދަތުރެއްގައި ގެނބިގެން މަރުވެ، “އެލްސާ”އަށް ލިބިފައިވާ އައިސް ބާރު ކޮންޓްރޯލް ނުކުރެވުމާއި ގުޅިގެން ދިމާވާ ހާދިސާތަކެއްގައި، “އެލްސާ” އެރެންޑެލް ދޫކޮށްދިޔުމުން، “އާނާ” އޭނަގެ ދައްތަ އެލްސާ ހޯދުމަށް ކުރާ މަސައްކަތެވެ.
ފްރޯޒެންގެ ދެވަނަ ބައިގައި ކުރިން ފޮރުވިފައިވާ ސިއްރެއް ހޯދުމަށް އާނާ އަދި އެލްސާ މަސައްކަތް ކުރާތަން ޓްރެއިލާއިން ފެނިގެންދެއެވެ. އަދި އާނާއާއި އެލްސާގެ ކުޑައިރުގެ ދުވަސްވަރު އެމީހުންގެ މައިބައިފައިންނާއެކު ފެނިގެންދާ މަންޒަރެއްވެސް ފަހުގެ ޓްރެއިލާއިން ފެނިގެންދެއެވެ.
މިހާތަނަށް އެންމެބޮޑު އާމްދަނީއެއް ލިބުނު އެނިމޭޓެޑް ފިލްމުގެ ރެކޯރޑް މުގުރާލައި، އޮސްކާރ އެވޯރޑް ހާސިލްކޮށްފައިވާ ފްރޯޒަންގެ ދެވަނަ ބައި ރިލީޒްކުރާނީ މި އަހަރުގެ ނޮވެމްބަރު 22 ގައެވެ.
