އެމެރިކާގެ މަޝްހޫރު މޮޑެލް ކައިލި ޖެނާއާއި އޭނަގެ ދަރިފުޅުގެ ބައްޕަ ޓްރޭވިސް ސްކޮޓް އާއި އޮންނަ ގުޅުމަށް ބުރޫ އަރާ މިހާރު އެދެމީހުން ވަކިވެފައިވާކަމުގެ ވާހަކައަކީ މިދުވަސްކޮޅު ސޯޝަލް މީޑިއާގައި އެންމެ ގިނައިން ދެކެވޭ ވާހަކައެވެ.
އަދި ހަމައެއާއެކު، މި ވާހަކަތަކުގެ އިތުރުން ކައިލީ އާއި އޭނަގެ ކުރީގެ ލޯބިވެރިޔާ ޓައިގާއާ އާއި އަލުން ގުޅިފައިވާކަމުގެ ވާހަކަތައް ވަނީ ފެތުރިފައެވެ. އެގޮތުން ޓްރޭވިސް ކައިލީ އާއި ވަކިވެފައިވަނީ، އޮޅުވާލައިގެން ޓައިގާއާއެކު ކައިލީ އުޅޭތީ ކަމަށްވެސް ވާހަކަތައް ވަނީ ދެކެވިފައެވެ.
ނަމަވެސް މި ވާހަކަތައް ކައިލީ މިވަނީ ދޮގުކޮށްފައެވެ. އެގޮތުން ކައިލި އިއްޔެ ކޮށްފައިވާ ޓްވީޓެއްގައި ބުނެފައިވަނީ، އިންޓަނެޓަކީ ކޮންމެ ކަމެއްވެސް 100 ގުނައަށް ޑްރާމާ ބޮޑުކުރާ ތަނެއް ކަމަށާއި، އޭނާ ޓައިގާއާ ބައްދަލުކުރަން ދަންވަރު 2 ޖަހާއިރު ނުދާކަމަށެވެ.
އަދި ޓައިގާއާއި ކައިލީ އެކުގައި ފެނުނު ވާހަކަތަކަށް ރައްދު ދެމުން ބުނީ، އޭނާގެ ދެ ރަހުމަތްތެރިއަކު ސްޓޫޑިއޯއަކަށް ލާން ދިޔަ އިރު އިއްތިފާގުން އެތަނުގައި ޓައިގާ ހުރީ ކަމަށެވެ.
މީގެ އިތުރުން، އިއްޔެ ކައިލި ކޮށްފައިވާ އެހެން ޓްވީޓެއްގައި ބުނީ، ޓްރޭވިސްއާއެކުގައި އޮންނަ ގުޅުން ރަނގަޅުކަމަށާއި، މިވަގުތު ދެމީހުންގެވެސް އެންމެ ބޮޑު ފޯކަސް އަކީ ދަރިފުޅު "ސްޓޯމީ" ކަމަށެވެ. އަދި އެންމެ ބޮޑު އިސްކަމެއް ދޭނީ ދެމީހުންގެ ރަހްމަތްތެރިކަމަށާއި އަދި ދަރިފުޅަށް ކަމަށް އޭނާ ބުނެފައިވެއެވެ.
ޓްރޭވިސް އޮންނަ ލޯބީގެ ގުޅުމަށް ނިއްމުމެއް އައިސްފާވާކަމަށް، ކައިލީ ސީދާ ނުބުނިކަމުގައިވިޔަސް، ޓްވީޓުގައި ދެމީހުންގެ "ރަހްމަތްތެރިކަމޭ" ބުނެފައި އޮތުމުން، ދެމީހުންގެ ލޯބީގެ ގުޅުމެއް ނެތްކަމަށް ބެލެވެއެވެ.
