ކުރިއަށް އޮތް ރައްޔިތުންގެ މަޖިލީހުގެ އިންތިހާބު ޕްރޮގްރެސިވް ކޯލިޝަނުން ކާމިޔާބު ކުރާނެ ކަމަށް، ކޮންގްރެސް ޕާޓީގެ ނައިބު ރައީސް އާދަމް ޝަރީފް އުމަރު ވިދާޅުވެއްޖެއެވެ.
ޕީޕީއެމް އާއި ކޮންގްރެސް ޕާޓީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ޝަރީފް ވިދާޅުވީ މަޖިލިސް އިންތިހާބާ ކުރިމަތިލާއިރު ގިނަ ގޮންޖެހުންތަކެއް އެ ކޯލިޝަނަށް ކުރިމަތިވެފައިވާ ކަމަށާއި ނަމަވެސް އެ ހުރިހާ ގޮންޖެހުންތަކާ އެކުވެސް މަޖިލިސް އިންތިހާބު ކާމިޔާބު ކުރައްވާނެ ކަމަށެވެ.
"އަޅުގަނޑުމެންނަށް މިވަގުތު މިހުރި ގޮންޖެހުންތަކާއެކު ވެސް އިރާދަކުރެއްވިއްޔާ ރައްޔިތުންގެ މަޖިލިސްގެ އިންތިހާބު ޕީޕީއެމް ކޮންގްރެސް ޕާޓީގެ ކޯލިޝަނުން ކާމިޔާބު ކުރާނަން" ކުރީގެ ޑިފެންސް މިނިސްޓަރު ޝަރީފް ވިދާޅުވިއެވެ.
ކުރީގެ ރައީސް ޔާމީން ހައްޔަރުކުރެއްވީ މަޖިލިސް އިންތިހާބަށް ހުރަސް އެޅުއްވުމުގެ ގޮތުން ކަމަށް ގަބޫލުކުރައްވާ ކަމަށް ޝަރީފް ވިދާޅުވި އެވެ. އެގޮތުން ޕްރޮގްރެސިވް ކޯލިޝަނުގެ ކެންޑިޑޭޓުން ކެމްޕެއިން ކުރުން ވެސް މެދުކަނޑާލުމަށްފަހު މިވަގުތު ތިބީ ޔާމީން މިނިވަން ކުރުމުގެ މަސައްކަތް ކުރުމަށް ކަމަށާއި އެގޮތުން އެ ބޭފުޅުންގެ ހުރިހާ ވަގުތަކާއި ހަކަތައެއް މިވަގުތު ހޭދަކުރަމުންދަނީ އެ މަސައްކަތަށް ކަމަށްވެސް ޝަރީފް ވިދާޅުވިއެވެ.
"ރައީސް ޔާމީން މިނިވަން ކުރެވެންދެން އަޅުގަނޑުމެންނަށް ކުރެވެން ހުރި، ހުރިހާ މަސައްކަތެއް ކުރިއަށް ގެންދާނަން" ޝަރީފް ވިދާޅުވިއެވެ.
